+Industry azokak 18 herrialdetako ia 900 enpresa bilduko ditu BECen

+Industry azoka inauguratu dute astearte honetan Barakaldoko (Bizkaia) BECen, eta 18 herrialdetako ia 900 enpresa industrial bilduko ditu ostegunera arte, erakusketa gunea "fabrikazio aurreratuaren nazioarteko erakusleiho" bihurtuz, Jaurlaritzako iturriek adirazi dutenez.

Azokak zazpi azoka industrial paralelo bilduko ditu eduki sinergikoko plataforma egituratu bakar batean. Hala, berrikuntza, 'networking' eta negozio aukerak sustatuko ditu balio kate osoan, SPRI Taldearen laguntzari esker.

Nazioarteko parte hartze nabarmena izango da -Alemania, Txina, Frantzia, Italia, Portugal, Belgika, AEB, Taiwan edo India, besteak beste-, bai eta euskal industriaren ordezkaritza zabal bat ere.

+Industry azokak formatu sektorizatua du, eta, horri esker, industria fabrikazioaren funtsezko prozesu guztiak ezagutu ahal izango dituzte parte hartzaileek ingurune dinamiko eta espezializatu batean.

Andoitz Korta Jaurlaritzako Industria Sustatzeko sailburuordeak parte hartu du azokaren inaugurazio ekitaldian, eta, nabarmendu duenez, "+Industry azokak euskal industriaren gaitasunak munduari erakusten laguntzen du, eta hauek dira: aurrerapena, ongizatea, aberastasuna eta kalitatezko lanpostuak".

Gainera, azokak "helburu garrantzitsu bat" betetzen duela azpimarratu du, hau da, "herritarrei erakustea, eta bereziki gazteenei, industria sektorean lehen mailako ibilbide profesional bat egin daitekeela".

"Etorkizuneko industria sektoreen ordezkaritza azpimarragarria izango dugu: automobilgintza, aeronautika, trena, energia, siderurgia, makina erreminta edo logistika. Hala, fabrikazio adimendunaren Estatuko azoka garrantzitsuena gara", ziurtatu du.