Imanol Pradales Lehendakaria izan da Mondragon Unibertsitatearen 2024-2025 ikasturteari hasiera emateko antolatutako ekitaldiaren buru. Bertan, Eusko Jaurlaritzaren helburu nagusia berretsi du, euskal unibertsitate sistema Europaren abangoardian jartzea, hain zuzen ere. Adierazi duenez, Europan eta munduan bizi dugun trantsizio-uneari "modu egoki, itxaropentsu eta bidezkoan" aurre egitea ahalbidetuko duen sistema bat.

Helburu horretan, Pradalesek anbizioa eta autoexijentzia aipatu ditu hori lortzeko giltza gisa, "apaltasunez eta gure tamainaz jabe izanik", eta baita guztion parte-hartzea ere. "Denok bat izango gara edo ez gara izango; bata bestearen aldean jarriko gara edo ez dugu lortuko", ziurtatu du.

Unibertsitate sistemaren eta enpresa sarearen arteko lankidetza

Horrela, Lehendakariak euskal kooperatibismoaren balioa azpimarratu du, "gure nortasunaren ezaugarritzat" jo duena, bere alde honak nabarmenduz, bere hitzetan, "amankomunean ditugun helburuak lortzeko indarrak batzea, unean uneko erronkei aurre egitea eta beti justizia soziala eta pertsona erdigunean jartzea" ahalbidetzen baitu.

Elkarlanaren eta enpresaren alderdi horiek unibertsitate eta zientzia esparrura hurbildu nahi izan ditu Imanol Pradalesek.

Lehendakariak nabarmendu du Mondragon Unibertsitateak enpresek eskatzen dituzten profil profesionalak identifikatzeko eta prestatzeko duen gaitasuna, eta azpimarratu du, era berean, aukera ematen diela pertsonei "gaitasunak, trebetasunak eta ezagutzak eskuratzeko", beharrei "erantzun egokia" emateko.

Hala, adierazi duenez, "unibertsitatea, enpresa eta gizarteko beste erakundeen arteko kooperazioa ezinbesteko faktorea da ikerketa, transferentzia eta aholkularitza bezalako arloetan" eta, gaineratu duenez, "lankidetzaren kultura landu, zabaldu eta hedatu" behar dugu.

Azkenik, unibertsitateetatik sortzen den ezagutzan zentratuta, Lehendakariak "ezinbestekotzat" jo du zalantza egiteko askatasuna, eta gaineratu du sistemak balioak eta jarrerak irakatsi behar dituela, hala nola "erantzukizunak bere gain hartzea, besteekin batera jardutea, ezberdinen artean lankidetzan aritzea edo jakintzarekiko jakin-mina piztea". "Unibertsitateak inoiz baino unibertsitate gehiago izan behar du", nabarmendu du.