Euskadik etorkizuneko erronkak finkatu ditu

Iñigo Urkullu lehendakaria komunikabideen aurrean agertu da gaur Miramar Jauregian ohiko bilera egiteko, ikasturtearen hasieran. Eta han gogoeta egin du orain arte egin denaz eta Euskadik etorkizunerako dituen erronkez. Ildo horretatik, lehendakariak adierazi du Euskal Komunitateak "helburu argiak dituela eta horiek lortzeko gogoz jarraituko duela lanean, etengabeko hobekuntza aplikatuz eta errealismoaren printzipiotik aldendu gabe".

Hala, eta ildo horretatik jarraituz, lehendakariak hau erantsi du: "Gizaki gisa egonkortasuna bilatzen dugula argi izanda, eta oinarri horretatik abiatuta, Jaurlaritzaren helburua da gure bizi-kalitatea egunero pixka bat gehiago hobetzea", azpimarratu du. Ildo horretan, lehenik eta behin, zerbitzu publikoak hobetzeko lanean jarraitzeko beharra azpimarratu du Urkulluk: Osasun Publikoa, Segurtasuna, Gizarte Zerbitzuak eta Hezkuntza. "Hobetzeko lan egingo dugu. Inbertitzen jarraituko dugu. Beti errealismoaren printzipioa aplikatuz. Gure etorkizuna hipotekatu gabe. Izan ere, urrats faltsu batek guztiok pairatuko ditugun ondorioak izan ditzake eta izango ditu. Zorroztasuna eta seriotasuna, atzerapausorik eman gabe. Gure konpromisoa da eta izaten jarraitzen du", adierazi du.

Ikasturte berriari begira, halaber, Lehendakariak azpimarratu du Gizarte Segurantzan afiliatutako milioi bat pertsona gainditu eta finkatu nahi direla, kalitatezko enplegua sortzen jarraituz. "Gure lan-merkatuak gure gazteei irteera onak eskaintzea lortu behar dugu. Gizarte gisa aurre egin behar diogu horri. Lan-baldintza onak izatea da aplika dezakegun gizarte-politikarik onena. Zenbat eta hobeak izan, orduan eta erraztasun gehiago izango dituzte emantzipatzeko eta nahi duten etorkizuna eraikitzeko. Bakarrik, bikotean edo familia bat sortuz ", adierazi du. Ildo horretan, Euskadi ekosistema aproposa izaten jarraitzearen alde agertu da Eusko Jaurlaritza, "pausoa ematera ausartzen diren pertsonentzat eta enpresek behar dituzten aukerak aurkitzeko lekua izan dadin. Inbertitzen, berritzen eta esportatzen duten enpresak ".

Bestalde, Iñigo Urkulluk esan du Jaurlaritzak bere etxebizitza-politikaren aldeko apustua egiten jarraituko duela, etxebizitza publikoen sustapena areagotuz eta eskubide subjektiboa bermatuz, baita gizonen eta emakumeen arteko berdintasun erreal eta eraginkor baten alde borrokatuz ere. “Tamalez, uda honetan berdintasun hori finkatzetik urrun dagoela ikusi dugu, inoiz gertatu behar ez diren jokabide onartezinak betiko baztertzen saiatuko gara".

Eusko Jaurlaritzak, gainera, Euskadiren aurrerapen sozioekonomikoan aurrera egiten jarraitzeko borondatea erakutsi du, "iraunkortasun ekonomikoaren, ingurumenekoaren eta sozialaren ikuspegitik", Giza Garapen Iraunkorraren ereduan sakonduz, Nazio Batuen 2030 Agendarekin eta haren 17 helburuekin lerrokatuta. "Izan ere, argi daukagu: ez dago B planetarik, eta gure konpromisoak argia izan behar du zentzu horretan", gaineratu du Urkulluk.

Bere hitzaldiaren beste une batean, Lehendakariak nabarmendu du Jaurlaritzak ikerketa eta garapen teknologikoko inbertsio publikoa handitzen jarraituko duela, 2030eko Zientzia, Teknologia eta Berrikuntza Planaren konpromisoarekin bat etorriz, "Jaurlaritzak kalitatezko zientzian sinesten duelako eta zientzia hori sustatzen jarraituko duelako, gure talentua sustatzeko eta kanpokoa erakartzeko baldintzarik onenak sortuz".