Gasteizko Udalak lankidetza hitzarmena sinatu du Haaly Pular elkarte afrikarrarekin

Gasteizko Udaleko gobernu batzordeakHaaly Pular elkarte afrikarrarekin lankidetza hitzarmena sinatzea onartu du, eta, akordioaren arabera, 2026an zehar jarduerak antolatzeko 25.000 euro bideratuko dizkio Garapenerako Lankidetza Zerbitzuak.

Akordioaren helburua da Arabako hiriburuaren eta Afrikaren arteko loturak sendotzeko ekintzak garatzea, herritarrak inplikatuz eta hiriak bizi diren afrikar jatorriko pertsonekin bizikidetza hobetzen lagunduz.

Ana Lopez de Uralde, Garapenerako Lankidetzako zinegotziak, udaletxean sinatu du hitzarmena Haaly Pular elkarteko ordezkari Alpha Oumar Diallorekin. Zinegotziaren hitzetan, "akordio honekin, Udal Gobernuak gizartea eraldatzeko sentsibilizazio eta hezkuntza ekintzak eta proiektuak babesten jarraitzen du".

"Ekintza horiek garapen bidean dauden herrialdeetako errealitatea gerturatzen diete herritarrei, desberdintasun globalei buruzko hausnarketa kritikoa sustatzen dute eta justizia global handiagoaren alde herritarren inplikazioa indartzen dute", gaineratu du.

Horrela, Haaly Pularrekelkartasuna sustatzeko eta kulturen arteko bizikidetza eta parte hartze soziala indartzeko jarduera programa garatuko du hirian urtea bukatu arte. Bere helburuen artean daude Afrikako errealitate ugariak ikusaraztea eta bertako kulturak eta hizkuntzak zabaltzea, hiriak dauden beste kultura, hizkuntza eta errealitate batzuekin loturak ezarriz.

Orobat, programak arreta jarriko du afrikarrek osatutako elkarteen eta kolektiboen gaitasunak genero ikuspegiarekin indartzean. Horrela, haien komunitateetan garapen eragile gisa duten zeregina indartu nahi da, eta, aldi berean, Gasteizko bizitzan duten parte hartze aktiboa sustatu.

Azkenik, Afrikako pertsonen eta kolektiboen eta hiriko beste talde batzuen arteko topaketa eta trukerako espazioak bultzatuko dira, elkarrekintza, elkar ezagutzea eta kulturen arteko bizikidetza sustatzeko.