Gasteizko Udalak Arabako Parke Teknologikorako garraio zuzena indartuko du

Gasteizko Udalak handitu egingo du hiriaren eta Arabako Parke Teknologikoaren arteko garraio zuzenerako lankidetza hitzarmenera bideratutako ekarpena, eta iaz 35.000 eurokoa izatetik aurten 42.000 eurokoa izatera igaroko da. Igoera horri esker, zerbitzua indartu eta parke teknologikoko langileen joan-etorrien benetako beharretara egokitzen jarraitu ahal izango da.

Hitzarmena Arabako Foru Aldundiarekin eta Arabako Parke Teknologikoa Kontserbatzeko Hirigintza Erakundearekin batera bideratu da, eguneroko joan-etorriak errazteko eta mugikortasun jasangarriagoa sustatzeko helburuarekin.

"Parke teknologikoa ekonomia eta berrikuntza mailako motorra da hiriarentzat. Garraio publikoko konexio eraginkorra ziurtatzea bertan lan egiten duten pertsonei laguntzearen eta parkearen beraren lehiakortasuna indartzearen baliokidea da", azaldu du Beatriz Artolazabal Espazio Publikoaren eta Auzoen zinegotziak.

Diru ekarpena handitzeak aukera emango du azken urteetan ezarritako hobekuntzei eusteko eta erabilera handieneko orduetan maiztasunak indartzeko, ibilgailu pribaturik gabe iristeko aukera emanez.

Artolazabalek azpimarratu duenez, "garraio publikoan inbertitzea mugikortasun garbian, jasangarritasunean eta sarbide berdintasunean inbertitzea da. Garen eta izaten jarraitu nahi dugun hiriarekin lerrokatutako erabakia da".

BESTE GAI BATZUK

Bestalde, Urdiaingo (Nafarroa) eta Zeberioko (Bizkaia) udalek osoko bilkurak izan dituzte aste honetan, eta UEMA Udalerri Euskaldunen Mankomunitateko kide izateko erabakia hartu dute biek. Abenduaren 13an egingo du UEMAk urte amaierako batzar nagusia, Etxarri Aranatzen (Nafarroa), eta orduan aztertuko ditu herri berrien eskaerak.

Zeberio eta Urdiain gehituta, 120 udal izango ditu mankomunitateak, eta guztien artean 355.000 biztanleko lurgune euskalduna osatzen dute, UEMAko iturriek jakinarazi dutenez.