Gasteizko Udalak San Martingo parkeko jolasgunea berrituko du

Gasteizko Udaleko Espazio Publikoaren eta Auzoen Saila San Martingo parkeko jolasgunea osorik berritzeko proiektua amaitzen ari da, eta datozen hilabeteetan lizitatuko ditu lanak.

Lehenengo urrats gisa, aste honetan, egun egoera txarrean dagoen joko bat desmuntatuko da. Joan den astearen amaieran balizatu zen, segurtasun arrazoiak zirela eta, Gasteizko Udaletik jakinarazi dutenez.

Gaur egun, parkeak bi jolasgune ditu: bata, desmuntatuko den elementuarekin, eta, bestea, eskaladarako jolasarekin, zabuekin eta kulunka jolasekin. Horietako batzuk diseinu berrian berrerabiltzeko berreskuratuko dira.

Etorkizuneko proiektuak espazio osoa berrantolatzea eta modernizatzea planteatzen du, belaunaldi ugarirentzako eremu gisa sustatuz, haurrentzako jolas eremu berezituekin, kirola egiteko elementuekin eta merenderoak eta atseden hartzeko guneak izango dituen gune berri batekin.

"San Martingo parkea hiriko berdegune handietako bat da, eta bertako jolasguneak egoera ezin hobean egotea nahi dugu", adierazi du Beatriz Artolazabal Espazio Publikoaren eta Auzoen zinegotziak.

Azaldu duenez, aste honetan egiten ari diren desmuntaketa lana berrikuntza zabalago baten lehen urratsa da, eta "espazio seguruagoa, irisgarriagoa eta adin guztietarako pentsatuagoa sortzea ahalbidetuko du".

Desmuntatze lanak aprobetxatuz, txorko berriak ere egingo dituzte eta azalera etorkizuneko eraberritze-lanetarako prestatuko dute. "Datozen egunetan proiektua kontrataziora bidaliko dugu lizitatzeko, eta, esleitu ondoren, auzoko bizilagunek aspalditik eskatzen duten aldaketa bati ekin ahal izango diogu", esan du.