Gasteizko Udaleko Berdintasun Zerbitzuak Jabetze Feministaren Eskolaren esparruan antolatutako Ikerlan Feministen VI. Lehiaketak bi lan proposamen saritu ditu, eraldaketarako tresna gisa eskalada proposatzen duen bat eta indarkeria matxistagatik akusatutako gizonei laguntza eraldatzailea emateko esperientzien inguruko beste bat, hain zuzen ere.

Horrela, Gasteizko Udaletik jakinarazi dutenez, Berdintasun Zerbitzuak Maria Francisca Masek aurkeztutako Escalada como herramienta para la transformación. Investigación-Acción-Participativa-Feminista para abordar la práctica deportiva desde una perspectiva interseccional ikerlana saritu du alde batetik.

Era berean, Joseba Gabilondok eta Borja Muñozek aurkeztutako Más allá del castigo: experiencias de acompañamiento feminista y restaurativo o transformador de hombres acusados de violencia machista en Euskal Herria ikerlana ere aitortu du.

SARIA

Saria eskuratu duten ikerlan proposamenek 5.000na euro jasoko dituzte eta egileek 2026ko maiatzera bitarte egin beharko dituzte. Gainera, Euskal Herriko Unibertsitateko (EHU) Emakume eta Gizonen Arteko Berdintasuna. Berdintasun Eragileak masterraren laguntza izango dute.

"Zorionak irabazleei. Seigarren edizio honetan, 5.000 euroraino handitu dugu saria, lehiaketa honi bultzada berria emateko, Jabetze Feministarako Eskolaren ekimen garrantzitsuenetako bat baita", azpimarratu dute Gasteizko Udaletik.

EHUko 'Emakume eta Gizonen Arteko Berdintasuna. Berdintasun Eragileak' masterreko ordezkari batek, Ikerlan eta Estatistikak Zerbitzuko ordezkari batek eta Berdintasun Zerbitzuko ordezkari batek osatu dute epaimahaia. Bi ikerlanen aurkezpen publikoa 2026ko ekainaren 4an egingo da, 18:30ean, Emakumeen Etxean.