Gasteizko Udalak 430.665 euro banatuko ditu etxebizitzak eta bizitegi eraikinak birgaitzeko laguntzetan

Gasteizko Udaleko gobernu batzordeak Alde Zaharreko hiriguneko eta gainerako auzoetako etxebizitzak eta bizitegi eraikinak birgaitzeko laguntzen deialdietako bi ebazpen berri onartu ditu ostiral honetan. 21 Zabalgunea udal sozietateak egindako ebaluazio teknikoaren ondoren, 303 eskaera berri onartu dira, eta guztira 430.665 euro jasoko dituzte.

Gasteizko Udaletik jakinartazi duenez, hiriko auzoetara bideratutako ebazpenetan, 259 eskaera onartu dira, eta horien guztizko zenbatekoa 314.665 euro da (batez beste 1.200 euro eskaera bakoitzari). Laguntza lerro hori PPrekin adostutako legegintzaldiko itunaren emaitza da. Itun horri esker, ekitaldi bakoitzean bi milioi euro bideratuko dira Gasteizko auzoetan hobekuntzak eta esku hartzeak egitera.

Alde Zaharreko hiriguneko etxebizitza eta eraikinetan hobekuntzak egiteko diru laguntzei dagokienez, jasotako 44 eskabidek aldeko ebazpena jaso dute eta horien guztizko zenbatekoa 116.000 euro izango da.

Hurrengo bi ekitaldietan laguntza lerro horiei jarraipena emateko, joan den astean egindako gobernu bilerak sei milioi euro mobilizatzea erabaki zuen, hiriko laguntzetan (urtean bi milioi euro) eta Erdi Aroko Hiriguneko laguntzetan (urtean milioi bat) zenbatekoei eusteko.

BESTE GAI BATZUK

Bestalde, Gasteizko Udalak 2026ko Inauteriak iragarriko dituen kartela hautatzeko lehiaketara lanak aurkezteko epea ireki du, azaroaren 12ra arte. Artista bakoitzak hiru eta bost ilustrazio edo diseinu bitarteko dosier bat aurkeztu behar du, eta haietako bi kartelak izan beharko dira.

Lan guztiak sinadurarik gabe agertu beharko dira, pertsona ez identifikatzeko, eta azken artearen kalitatea eta hautagaiaren ilustrazio edo diseinu laneko estiloa edo gaitasunak baloratzeko, Gasteizko Udaletik jakinarazi dutenez.