Ertzaintzako agenteek Gasteizko diskoteka batean sartu eta miaketa egin zuten igande goizean eta 17 espediente ireki zituzten Herritarren Segurtasuna Babesteko Legea urratzeagatik, substantzia sorgorgarriak eta arma zuriak edukitzea leporatuta. Gainera, gizon bati eginbideak ireki zizkioten ikertu gisa osasun publikoaren aurkako delitu batengatik.
Eusko Jaurlaritzako Segurtasun Sailak jakinarazi duenez, Ertzaintzak Gasteizko Zabalgunean dagoen ostalaritzako lokal batean burutu duen esku hartzea Arabako hiriburuan Arma Zuriak eta Objektu Arriskutsuak Kontrolatzeko Ekintza Planaren barruan egin da.
Beste 17 pertsonari espedienteak ireki zizkieten Herritarren Segurtasuna Babesteko Legea urratzeagatik
Operatiboan esku hartu zuten agenteek bertan zeuden bezeroak identifikatu zituzten eta, prebentziozko miaketak egin ondoren, lokaleko langile bati eginbideak ireki zizkioten ikertu gisa osasun publikoaren aurkako delitu batengatik, substantzia sorgorgarriak konfiskatu ondoren.
Bestalde, beste 17 pertsonari espedienteak ireki zizkieten Herritarren Segurtasuna Babesteko Legea urratzeagatik, gehienei legez kanpoko substantziak edukitzeagatik. Bi gazteri salaketa administratiboen aktak ireki zizkieten arma zuri bana konfiskatu ondoren.
JARDUNALDIA
Bestalde, Bilboko Udaltzaingoak ate irekien jardunaldi bat egingo du Miribillako komisarian azaroaren 7an, 181 urte beteko dituen egunaren bezperan, hain zuzen ere. Joan nahi dutenek aldez aurretik eman beharko dute izena udal webgunean eskuragarri dagoen formularioa betez.
Horrela, Bilboko Udcaletik jakinarazi dutenez, herritarrek aukera izango dute bertatik bertara ezagutzeko udaltzainen eguneroko lana, funtzioak eta baliabideak, bai eta instalazioak eta laneko elementuak ere.
Bisitak gehienez 25na laguneko taldeetan antolatuko dira, eta hurrengo ordutegi hauek eskainiko dira, aukeratzeko: 17:00, 17:30, 18:00, 18:30, 19:00, 19:30 eta 20:00.
Formularioan inskripzioa egiten duen pertsonaren helbide elektronikoa bakarrik eskatuko da, nahiz eta bisitara beste norbaitekin joan. Behin eskaria eginda, posta elektronikoz jasoko da baieztapena, bisitakudaltzaingoa@bilbao.eus helbidearen bidez.
