Gasteiz Trail mendi lasterketaren hamabosgarren edizioa jokatuko da irailaren 20an

Gasteiz Trail mendi lasterketaren hamabosgarren edizioa jokatuko da irailaren 20an, eta 15 nazionalitatetako 850 kirolari bilduko ditu 16 eta 26 kilometroko distantziak egiteko, Eraztun Berdea, Armentiako Basoa eta Gasteizko mendiak (Zaldiaran, Areatza, Arrieta eta Eskibel) zeharkatuz.

Aurkezpenean azaldu dutenez, aurten, lehen aldiz, 18 kilometroko martxa eta Euskadin egingo den lehenengo TxakurKrosa ere antolatu dituzte. Lasterketa guztien irteera eta helmuga Cervantes pasealekuan egongo dira.

Ascentium enpresak antolatu du lasterketa Gasteizko Udalaren eta Vital Fundazioaren laguntzarekin, eta azken edizioetan izandako antzeko parte hartzea izango du aurten, 850 kirolarirekin; horietatik %28 emakumeak izango dira, iaz baino %3 gehiago.

Euskal Herriko eta Espainiako parte hartzaileez gain, Amerikako Estatu Batuetatik (AEB), Finlandiatik, Mexikotik eta Alemaniatik iritsitako kirolariak ere lehiatuko dira, besteak beste.

Distantzia berriko atletak izango dira ateratzen lehenak, 18 kilometro martxa 08:00etan abiatuko baita Cervantes pasealekutik (Mendizorrotzeko kirol-instalazioen eta Estadio Fundazioaren ondoan). Ibilbideak tarte teknikoak, basoak eta paisaia ikusgarriak izango ditu, 800 metroko desnibelarekin.

Ordu erdi geroago, 08:30ean, TxakurKrosa abiatuko da. Lehiakideek bost kilometroko distantzia osatu beharko dute (batez ere Armentiako basoan zehar), 78 metroko desnibel arinarekin.

16 eta 26 kilometroko lasterketa tradizionalak 09:30ean hasiko dira, TxakurKrosa amaitu ondoren. Distantzia laburrenak 650 metroko desnibela izango du, eta 26 kilometrokoak, berriz, 1.299 metrokoa.