Bizikletentzako aparkaleku seguru berria zabaldu dute ostiralean Gasteizko Zaramaga auzoan

Bizikletetarako aparkaleku seguru berria jarri da martxan ostiralean, uztailaren 25ean, Gasteizko Zaramaga auzoko Bernal Díaz de Luco kalean. Ohiko 45 bizikleta eta 'cargo bike' delako bat gordetzeko edukiera du, eta bizikletetarako aparkaleku seguruen udal sarearen parte da. Sareak 18 kokapen ditu jada hiri osoan zehar banatuta, 1.212 plazarekin.

Aparkaleku berria Eusko Jaurlaritzaren Inbertsio Estrategikoen Erakunde arteko Planaren barruan dago, eta Gasteizko Udalak Zaramagako hiri eta gizarte mailako berroneratzean jarduteko duen konpromisoarekin lerrokatuta, igogailu, trasteleku edo espazio komunen gabezia dela eta, auzoan zaila baita bizikletak etxebizitza partikularretan gordetzea.

Beatriz Artolazabal Espazio Publikoaren eta Auzoen zinegotziaren hitzetan, "modulu berria Zaramagan jarrita, beste urrats bat eman dugu hiri osoan bizikleta sare seguru eta eraginkorra sendotzeko lanean".

"Hiri jasangarria eraikitzen jarraitzen dugu, eta horrek bizikletaz mugitzen direnei benetako irtenbideak eskaintzea eskatzen du. Garraiobide hori aukeratzen duen edonork azpiegitura erosoa, gertukoa eta babestua izatea nahi dugu", azaldu du.

Gaur egun, hirian bizikletentzako 17 aparkaleku seguru daude eta sarea hazten ari da, mugikortasun jasangarria sustatzeko eta bizikletaren eguneroko erabilera errazteko Gasteizko Udalak bere gain hartutako konpromisoa dela eta. Zaramagako aparkaleku berriaz gain, aurten beste bi modulu instalatuko dira Sansomendin eta San Martinen, eta horien pleguak kontratazio fasean daude dagoeneko.

Gasteizko Udalaren arabera, horrelako azpiegiturek irtenbide eraginkorra eskaintzen dute lapurreten eta bandalismoaren aurrean, eta bizikleta eguneroko garraiobide gisa erabiltzea sustatzen dute hiri ingurune atseginago, garbiago eta osasungarriagoan.