Gasteizko Udal Musika Bandak aire zabaleko musika zikloa hasiko du ostiralean

Gasteizko Udal Musika Bandak aire zabaleko musika zikloa abiatuko du ostiralean, maiatzaren 30ean, eta hamar emanaldi eskainiko ditu urriaren 12ra arte Uraren Lorategi Sekretuan, Goikolarran, San Martinen, Judimendin eta El Pilarren.

Sonia Diaz de Corcuera Gasteizko Udaleko Kultura zinegotziak programa aurkezteko prentsaurrekoan adierazi duenez, "bandaren bonu denboraldiaren amaierarekin batera, bandako musikariak ez dira gelditzen, udan ere izaten baita musika Gasteizen eta, gainera, aire zabalean, interpretatzen dituzten obrak Gasteizko herritarrengana hurbilduz".

"Ziklo irekia, kalitatezko errepertorioarekin eta musika hiriko auzoetara hurbilduz, bandaren jarraitzaile ez direnak ere egun batez izan daitezen", gaineratu du.

Luis Orduña eta Iker Olazabal izango dira kontzertuen zuzendariak, Gasteizko Udal Musika Bandaren zuzendaria eta zuzendariondokoa, hurrenez hurren.

Orduñak azaldu duenez, "ikus-entzule guztientzat pentsatutako errepertorio askotarikoa eta erakargarria duten kontzertuak dira, gainera ikus-entzule berriengana iristea bilatuz, Uraren Lorategi Sekretuan dugun presentziari hala eskatu duten hiriko hainbat auzotan emango diren kontzertuak gehitu behar zaizkiolako".

"Europa jauregiko denboraldian bandarako egungo errepertorioan aritzen bagara ere, kontzertu hauetan jazza, zarzuela, pasodobleak, herri musika edo zinemako musika interpretatuko ditugu, adibidez. Esperientzia hori guztia gurekin partekatzera gonbidatzen ditugu gasteiztarrak", esan du.

Olazabalek gaineratu duenez, "plazer handia da kontzertu horietako batzuk zuzentzea auzoetan eta Uraren Lorategi Sekretua bihurtu den aire zabaleko auditorioan. Aire zabaleko musika zikloak ikus-entzule guztiengana oso modu berezian iristeko eta kontzertu bakoitza esperientzia bizia, irekia, ingurunearekin eta herritarrekin lotuta dagoena bilakatzeko aukera ematen digu".