XIX. mendeko Zabalgunearen diseinua eta hobekuntza eztabaidatuko dute Amarica aretoan egiten ari diren solasaldien jardunaldietan

XIX. mendeko Zabalgunearen etxadietan egin daitezkeen balizko jarduketak identifikatzea eta ebaluatzea izango da aste honetan Gasteizko Amarica aretoan egingo dituzten solasaldien jardunaldien helburua.

21 Zabalguneak zuzendu eta antolatzen dituen jardunaldiotan ahalik eta pertsona gehienen ekarpenak jasoko dira, ondoren garatu ahal izateko; eta helburua da XIX. mendeko Zabalgunearen birgaitze energetikorako eta hiri-berroneratzerako azterketaren garapenean parte hartzea herritarrek.

Astelehenean egingo den solasaldiaren helburua izango da arlo horretako jarduera ekonomikoa berreskuratzeko ekarpenak biltzea, enpresa berriak edo herrian dagoeneko instalatuta dauden enpresak espazio horretan koka daitezen, proiektu teknologikoak, kulturalak, berrikuntzakoak edo negozio-ildo berriak dituztenak garatzeko.

Asteartean, dinamizazio komertzial hobea eta horren logistika sustatzeko modua jorratuko da. Helburua da tokiko merkataritza suspertzea, merkatarien gaitasunak eta ezagutzak hobetuz edo negozioen modernizazioan eta jasangarritasunean laguntzeko finantzaketa handituz.

Asteazkenean, komunitateek etxadien birgaitzean eta berroneratzean duten lankidetza eta antolakuntza jorratuko dute, hainbat arlotako proposamenak bilduz: trantsizio energetikoa, karbono-aztarna murriztea teknologia jasangarriak eta energia berriztagarriak ezarriz, ingurune ekologikoagoen sustapena edo etxebizitza-eredu desberdinak.

Eko-barruti Ekintzailea Proiektuaren barruko jardunaldi parte-hartzaile hauek ostegunean amaituko dira. Egun horretan, biztanleak eta bisitariak modu efiziente, seguru eta jasangarrian bizi eta mugitu daitezen eta zerbitzuetarako sarbidea izan dezaten beharrezko mekanismo urbanistikoak eta kudeaketarako mekanismoak planteatuko dira. Etorkizuneko Zabalgunea diseinatzeko modua jorratuko da.

Solasaldiak Ensanche XIX Zabalgune Elkarteak dinamizatuko ditu eta 19:00etatik 20:30era izango dira.