EAEko administrazio publikoen defizita 3.337 milioi eurokoa izan zen 2023an

Euskal Autonomia Erkidegoko (EAE) administrazio publikoek (euskal administrazioak, Estatuko administrazio lurralderatua eta Gizarte Segurantza lurralderatua) 3.337 milioi euroko defizita izan zuten 2023an, hau da, aurreko urtean baino 365 milioi euro gehiago, Eustat erakundeak Europar Batasuneko Nazio eta Eskualde Kontuen Europako Sistemak ezarritako irizpideen arabera landutako datuen arabera.

2023an kudeatutako baliabide ez-finantzarioak 34.878 milioi eurora iritsi ziren, 2022an baino %6,7 gehiago, eta enplegu ez-finantzarioak %7,1 hazi ziren, 38.214 milioi eurora arte. Emaitza 3.337 milioi euroko finantzaketa beharra izan zen, aurreko urtean baino %12,3 handiagoa.

Erakundeen ikuspegitik, Eusko Jaurlaritzak, foru aldundiae, udal erakundeek eta administrazio publiko gisa sektorizatutako mendeko erakundeek 667 milioi euroan egin zuten okerrera euren saldoan 2023an, 2022an 465 milioi euroko finantzaketa ahalmena (superabita) izatetik, 2023an 203 milioi euroko finantzaketa beharra (defizita) izatera igaro baitziren.

Zehazkiago, Jaurlaritzari dagozkion erakundeen saldoak 87 milioi euro egin zuen behera, eta 2022an 19 milioi euroko saldo negatiboa izatetik 2023an 106 milioi euroko saldo negatiboa izatera igaro zen.

Arabako foru eta udal administrazioen multzoak, oro har, 31 milioi euroko saldo positiboa izan zuen, aurreko urtean baino 26 milioi gutxiago. Bizkaiak 368 milioi euroan murriztu zuen bere saldoa, 2022an 201 milioi euroko saldo positiboa zuen bitartean, 2023an 167 milioi euroko saldo negatiboa izan baitzuen. Gipuzkoak ere okerrera egin zuen, eta 2022an 226 milioi euroko saldo positiboa izatetik 2023an 40 milioi eurokoa izatera igaro zen.

Administrazio lurralderatuari dagokionez (Estatua gehi Gizarte Segurantza), 303 milioi euroan hobetu zuen bere saldoa, eta 2022an 3.437 milioi euroko finantzaketa beharra (defizita) izatetik 2023an 3.134 milioi eurokoa izatera pasatu zen.

AZKEN GASTUA

Bestalde, administrazio publikoen azken gastuaren egituran, azken kontsumoko gastua, administrazioek ondasun eta zerbitzuen produkzioak egindako gastua gehi etxeei hornitzen zaizkien merkatuko ekoizleek ekoitzitako ondasun eta zerbitzuak batuta, barne eskari publikoaren %85,3 izan zen 2023an -aurreko urtean baino %3,3 puntu azpitik-.

Kapital eraketa gordinak (inbertsio publikoa), berriz, barne eskariaren %11,4tik %14,7ra egin zuen gora, eta 2.738 milioi eurora iritsi zen.

Erakundeen aldetik, inbertsioen %95,2 euskal administrazioek egin zuten; hala, 2.608 milioi eurora iritsi zen, hau da, 2022an baino 770 milioi euro gehiago. Estatuko administrazio eta Gizarte Segurantza lurralderatuei dagokien zenbatekoa 130 milioi eurokoa izan zen, aurreko urtean baino 26 milioi euro gehiago.

Azkenik, BPGri dagokionez, EAEko administrazio publikoen defizita %3,6koa izan zen 2023an, hau da, %0,2 puntu igo zen aurreko urtearekin alderatuta.