168.000 euro inguru, Olarizuko Lorategi Botanikoan eta Eraztun Berdean egindako lanetan

Gasteizko Udalak 167.981,54 euro inbertitu ditu Olarizuko Lorategi Botanikoko sarbideak hobetzeko eta Eraztun Berde osoan banku berriak jartzeko lanetan.

Hain zuzen, Olarizuko Lorategi Botanikoari dagokionez, Zubigarai, Jauregilanda eta Iturritxu kaleetan eta Olarizu etorbidean dauden alboko sarrerak egokitu dira. Jauregilandan iparraldeko sarrera, baserri zaharraren hondakinen ondokoa, ez da egokitu, Landare Erabilgarrien Lorategia eraikitzea aurreikusi baita, eta sarbide nagusia izango da.

Olarizuko Lorategi Botanikoaren sarreren egokitzapen lanek 94.190 euroko kostua izan dute, BEZ barne, eta Europar Batasuneko 'Next Generation' funtsek finantzatu dute.

"Jarduketa honen bidez, lorategia bisitatzen duten pertsonek lorategia espazioan ezagutzea bultzatu nahi dugu, eremu mugatu eta berezitzat har dezatela, Eraztun Berdearen gainerako eremuak bezala, urte osoan zehar nahi duenarentzat irekita dagoen arren", adierazi du Gasteizko Ingurumen Kudeaketako zinegotzi Pascual Borjak.

Bestalde, Lorategi Botanikoak 'Vitoria-Gasteiz' ereduko 43 banku jarri ditu bide sareko hainbat tokitan, Eraztun Berdearen parke guztiak eserlekuz hornitzeko proiektu zabalagoaren baitan. Bankuek altzairu galbanizatuzko egitura dute, bizkarraldearekin eta beso euskarriarekin, eta bakoitzaren bi aldeetan gune libre bat errespetatu da gurpil aulkiak aparkatzeko.

Jarduerak 73.791,54 euroko kostua izan du (BEZ barne), eta Berreskurapen, Eraldaketa eta Erresilientzia Planerako 'Next Generation' EB funtsekin finantzatu da.

"Bigarren esku hartze honekin, Olarizuko Lorategi Botanikoaren eta Gasteizko Eraztun Berdearen gainerako parkeen irisgarritasuna handitu nahi izan dugu, mugikortasun arazoak dituzten pertsonek modu erosoagoan bisitatu ahal izan dezaten, gure hiriko bitxi naturaletako bat baita", azaldu du zinegotziak.