Araba Basket Cup txapelketa jokatuko da irailean kadete eta junior mailetako 64 talderen partaidetzarekin

Gasteizko Udalak, Eusko Jaurlaritzako Turismo, Merkataritza eta Kontsumo Sailaketa eta Arabako Foru Aldundiak Araba Basket Cup txapelketa berria sortu dute elkarlanean, gazteen talentua sustatzeko, saskibaloiaren oinarria lurraldean zabaltzeko eta etorkizuneko jokalarien belaunaldientzat espazio lehiakor eta hezitzailea sortzeko. Txapelketa irailaren 11tik 14ra jokatuko da, eta kadete eta junior mailetako 64 taldek parte hartuko dute.

Ekimenaren sustatzaileek jakinarazi dutenez, txapelketa berriak oinarrizko saskibaloian erreferente izateko asmoa du, Araban kirol hori hazten lagunduta eta kluben, komunitatearen eta harrobiaren arteko lotura indartuta.

Nazioarteko txapelketa izango da, kadete eta junior mailetara bideratua, gizonezkoei zein emakumezkoei, eta klub profesionalen harrobiak, bertako zein nazioarteko taldeak eta saskibaloiaren etorkizun handiko gazteak bilduko ditu.

Ekimenaren bidez, Jaurlaritzak, Gasteizko Udalak eta Arabako Aldundiak "saskibaloiaren etorkizunarekin duten konpromisoa" berretsi dute, "tokiko talentua garatzearen eta Arabako saskibaloi osoaren onurarako kirol proiektu sendo hau sortuta".

Bestalde, Arabako Foru Aldundiak astearte honetan onetsi du gobernu bileran Euskorpora euskararen teknologia digitaletara bideratutako hizkuntza datuak sortzeko eta kudeatzeko elkarteari atxikitzea, erakunde elkartutako pertsona gisa.

Foru erakundetik jakinarazi dutenez, Euskorporak corpus digitalak eta hizkuntzarekin eta ahotsarekin lotutako teknologien aurrerapena errazteko beste hizkuntza baliabide batzuk sustatu, sortu eta garatzen dihardu, hala nola itzulpena, transkripzioa, azpititulazioa edo hizketaren sintesia.

Bere jardueraren helburua da baliabide horiek hizkuntza gutxituen, administrazioen, enpresen eta gizartearen eraldaketa digitalaren zerbitzura jartzea.

Euskorporan sartzeak ez dio kostu ekonomikorik ekarriko Arabako Foru Aldundiari, bazkide instituzionalek ez baitute ordaindu beharko ohiko kuotarik, ohiz kanpokorik, diru sarrerarik eta derramarik.