Mikel Jauregizar 21 urteko jokalari bermeotarrak eta Athletic Club taldeak akordioa lortu dute bien arteko aurreko kontratua lau denboraldirako luzatzeko, 2031ko ekainaren 30era arte, etete klausularik gabe.
Kontratu berriaren sinadura ekitaldia San Mamesen egin da, ostiral honetan, Jon Uriarte presidentea, Mikel Gonzalez futboleko zuzendari nagusia eta jokalaria bertan zirela.
Talde zuri-gorriak sarean argitaratutako ohar batean adierazi duenez, Mikel Jauregizar Athletic Cluben "gorantz doan jokalaria da", eta bere hazkundea "ikusgarria" izan da 2021eko udan Bermeo FT taldetik Lezamara heldu zenetik.
"Abiadura handiz" etapak gainditu ditu, eta, 2023-2024ko denboraldian hamar partidatan parte hartu ondoren, Ernesto Valverdek "sekulako protagonismoa" eman dio bukatu berri den denboraldian.
Presio aurreratuan "eskuzabaltasuna" erakusteaz gain (Bartzelonako Pedrik soilik gainditu du aurkarien zelaian egindako baloi lapurretetan), garrantzia hartu du joko sorreran eta aurkariaren ate aurrean. Horrela, bermeotarrak hiru gol sartu ditu, azkena 0-1ekoa Old Trafforden.
Jauregizarrek De Marcosen 18 zenbakia aukeratu berri du, eta Espainiako 21 urtez azpiko selekzioarekin doa berehala Eslovakian jokatuko den Europako Txapelketan parte hartzera.
Jokalari bermeotarraren kontratu berritzea Bilboko klubaren kontratu politikaren barruan kokatzen da, soldata oinarri egonkorra eta kirol errendimenduari lotutako pizgarriak uztartzen dituena, hain zuzen ere, ondorioztatu dute bertatik prentsa-ohar baten bitartez.
