Arabako Aldundiak kanpaina abiatu du familiek etxe hutsak aloka ditzaten senide bat egoitza batean sartzen denean

Arabako Foru Aldundiak informazio kanpaina bat jarri du martxan hurbileko pertsona bat egoitza batean duten familientzat edo senide horren etxebizitzarekin zer egin baloratzeko unean daudenentzat. Kanpaina Gizarte Ongizaterako Foru Erakundearen egoitza eta zerbitzuetan zabalduko da, Arabako Foru Aldundiaren Etxebizitzen Alokairua Bermatzeko Programaren berri emateko, foru erakundeak Elkarrekin Podemosekin egindako aurrekontu akordioaren ondorioz.

Foru erakundeak jakinarazi duenez, 'Zer egin etxebizitzarekin senide bat egoitza batean sartzen denean?' mezuarekin, kanpainak familia askorentzat ohikoa den egoera bat planteatzen du: pertsona bat egoitza zentro batean sartzea eta bere etxebizitzarekin zer egin erabaki beharra.

Horrela, Arabako Aldundiak familia horiei lagundu nahi die prozesu horretan, eta alternatiba seguru bat eskaini, berme publikoekin, etxebizitza hori alokairuaren merkatuan sartzeko aukera balora dezaten, Laura Perez Borinaga Lurralde Orekako foru diputatuak eta Gorka Urtaran Gizarte Politiketako foru diputatuak ekimenaren aurkezpenen azaldu dutenez.

Programak aukera ematen du egoera onean dagoen etxebizitza huts bat alokairuan jartzeko, 20.000 biztanletik beherako udalerrietan kokatutako herriguneetan, laguntza publikoak eskaintzen dituen lasaitasun eta bermeekin. Babes publikoko erregimeneko etxebizitzak kanpoan geratzen dira.

Arabako Foru Aldundiak nabarmendu du ekimenak helburu bikoitza duela: alde batetik, familiei etxebizitza zainduta mantentzea ahalbidetzen die, eta bestela hutsik egon litekeen etxea aprobetxatzea; bestetik, beste pertsona batzuei bizitegi konponbideak eskaintzen laguntzen du, batez ere alokairuko etxebizitzen eskuragarritasuna mugatuagoa izan daitekeen udalerrietan.

LAGUNTZA ESPEZIALIZATUA

Programaren bidez, familiek laguntza espezializatua dute kasu bakoitza aztertzeko eta etxebizitzaren aukerak baloratzeko. Laguntza horren barruan sartzen dira maizterrak ordaintzeko duen gaitasuna egiaztatzea, ez ordaintzearen aurrean estaldura ematea, etxebizitzaren egoera berrikustea alokairuaren aurretik eta ondoren, eta kalteen aurreko aseguru bat. Gainera, kontratua indarrean dagoen bitartean, Aldundiak laguntza jarraitua, defentsa eta laguntza juridikoa eskaintzen ditu, erabat estalita.

Arabako Foru Aldundiak azaldu du kanpaina foru erakundea etxebizitzaren arloan garatzen ari den lan ildoetako bat dela, eta arreta berezia jartzen duela hutsik dauden etxebizitzen aprobetxamenduan, alokatzeko aukera berriak sortzean eta familiei laguntzean, bizi aldaketako uneetan.

Gizarte Ongizaterako Foru Erakundearen egoitza eta zerbitzuetan egongo dira informazio materialak -liburuxkak eta kartelak-, familiek programaren ezaugarriak ezagutu, lehen zalantzak argitu eta konpromisorik gabeko informazio gehigarria eskuratu ahal izateko.

"Kanpainak mezu argia helarazi nahi du: familia batek bere buruari galdetzen dionean zer egin egoitza batean sartzen den pertsona baten etxebizitzarekin, aukera segurua, lagundua eta berme publikoduna dago. Helburua da familia bakoitzak erabakia hartu ahal izatea, informazioarekin, lasaitasunarekin eta erakundeen babesarekin", adierazi dute.