Arabako Aldundiak milioi bat euroko autoeskailera ibilgailu bat erosi du foru suhiltzaileentzat

Arabako Foru Aldundiko gobernuaren kontseiluak Global Projects Supllies S.L. enpresari esleitu dio Arabako Foru Suhiltzaileak erakunde autonomoarentzako autoeskailera ibilgailu baten erosketa. Esleipenaren zenbatekoa 874.100 eurokoa da, eta 1.057.661 eurokoa BEZ barne. Kontratua formalizatu eta gehienez ere 13 hilabeteko epean entregatu beharko da ibilgailua.

Foru erakundearen arabera, ordainketa bi fasetan egingo da: 105.766,10 euro 2025eko aurrekontuaren kontura, eta 951.894,90 euro 2026koaren kontura. Esleipena prozedura ireki baten ondoren egin da, baldintza tekniko eta administratibo guztiak betetzen zituen eskaintza bakar batekin.

Ibilgailu berriak suhiltzaileen ahalmen operatiboa indartuko du salbamenduko eta suteak itzaltzeko lanetan, bereziki altuerako esku hartzeetan. Arabako Foru Aldundiak segurtasun eta larrialdi zerbitzu publikoak hobetzeko duen konpromisoaren parte da inbertsioa.

BESTE GAI BATZUK

Bestalde, beste gai batzuekin jarraituz, Gipuzkoako Foru Aldundik gobernu kontseiluak berdintasunaren alde lan egiten duten lurraldeko emakumeen elkarteentzako diru laguntzen deialdi berria onetsi du astearte honetan, eta 2026rako diru saila 510.000 eurora handitu du, aurten baino 50.000 euro gehiago, "Gipuzkoan ahalduntzea sustatzen duten elkarte feministen eta emakumeen elkarteen funtsezko lana" babesteko.

Irune Berasaluze foru erakundeko bozeramaileak nabarmendu duenez, "deialdiaren %11ko igoera honekin, Aldundiak berdintasunaren eta elkarte sarearen alde lan egiten duen komunitatea indartzen jarraitu nahi du, haiek matxismoaren aurka eta berdintasunaren alde gure lurraldean egiten duen lan garrantzitsua babestuz, gizarte bidezkoago eta parekideago baterantz urrats gehiago emateko, eremu guztietan".