Otsailaren 7an, asteazkenean, ‘Herrandarren Kale Berria’ proiektuaren obren bigarren faseari ekingo zaio. Etapa berri honetan, Herrandarren kalea itxita egongo da Estenaga Apezpikuaren kalearen eta Karlos I.aren biribilgunearen artean, Iparralde Gizarte Etxearen aurrean. Zirkulazioa Ballester Apezpikuaren kaletik desbideratuko da, eta dagoeneko bi errei izango ditu iparralderantz. Fase horretan, Tuvisak 3. eta 8. lineak Ballester Apezpikuaren kaletik desbideratu beharko ditu eta behin-behineko bi geltoki jarriko dira. Aldaketa horren ondorioz, zirkulazioa handitu egingo da Ballester Apezpikuaren kalea-Valladolid kalea-Nafarroako Errege-erreginen kalea arteko biribilgunean. Hori dela eta, aurreko bidegurutze batzuetan seinaleztapena jarriko dute, puntu horretara iristea ekiditeko alternatiba gisa baliagarriak izango diren beste ibilbide batzuk gomendatuz.
Moztutako kaleko tartean dauden garajeetara, saltokietara eta zamalanetako eremuetara iristeko, baimenduta egongo da Iparraldeko biribilgunetik igarotzea eta, ondorioz, zirkulazioan noranzko-aldaketa egin beharko da. Bigarren fase honetako lanek ekainera arte iraungo dute gutxi gorabehera, eta 2025eko udaberrian amaituko da esku-hartze guztia.
Beatriz Artolazabal alkateorde eta Espazio Publikoaren eta Auzoen zinegotziak azaldu duenez, “ia lau hilabete igaro dira Herrandarren kaleko obrak hasi zirenetik. Hiriko gune garrantzitsu hau eraldatzeko jarduera handia da; eremua atseginagoa, berdeagoa eta pertsonen gozamenerako egokiagoa izatea helburu duena”.
Lehen fase honetan, lanak normaltasun osoz egin direla eta dena aurreikusitakoaren arabera egin dela gaineratu du. Puntu honetan, Artolazabalek eskertu egin nahi izan du lanak kaltetu dituzten herritarren “ulermena eta pazientzia”, eta emaitzak merezi izango duela adierazi du. “Eskerrak eman nahi dizkiet auzokideei, saltokiei, ostalaritzako lokalei, taxilariei… era batera edo bestera aldaketa horiek guztiak jasaten dituzten kolektibo guztiei. Eskerrak eman nahi dizkiet ulermenagatik eta pazientziagatik. Obra orok hainbat eragozpen dakartza berekin. Honako hau obra handia da, hilabete askokoa, eta badakit ingurune horretan bizi, lan egin edo bertatik igarotzen diren pertsonentzat eragozpenak sor ditzakeela. Ulertzen dut. Baina azken emaitzak merezi izango du. Etorbide berde handi bat izango dugu, jolasekin, landaretza gehiago, zuhaitz gehiago, zarata gutxiago… hiri osorako eremu jasangarriago bat “.
Zirkulazioan izandako aldaketa horiez guztiez ohartarazteko, Udalak kanpaina bat aktibatu du igandetik, komunikabide guztietan publizitatea egiteko eta informazio guztia eguneratuta izateko www.vitoria-gasteiz.org/losherranberria Udalaren webean egokitutako gunean.
Proiektuak 17 hilabeteko gauzatze-epea du (obrak 2023ko urri erdialdean hasi ziren) eta 12 milioi euroko inbertsioa jaso du. Hori guztia aurrera eramateko, Trantsizio Ekologikorako eta Erronka Demografikorako Ministerioaren (MITECO) Bioaniztasuna Fundazioaren laguntza jaso du Europar Batasuneko NextGenerationEU funtsekin finantzatutako Susperraldi, Eraldaketa eta Erresilientzia Planaren baitan.
