Lurraldean enpresen lehiakortasuna sustatzeko eta industriaren arloan sortzen ari diren erronkei heltzeko ahaleginean, Araba 4.0k saio interaktibo bat antolatu du, Erronka berriak Araba 4.0rako izenburupean. Ostegun honetarako programatuta dago, Gasteizko Europa Biltzar Jauregian, eta Arabako Foru Aldundiaren babesa du.
Eraldaketa globaleko agertoki batean enpresek aurre egin behar dieten erronka berriak azaltzeko diseinatuta dago jardunaldia, baita Industria Adimenduna lortzeko bidean laguntzeko ere, Araba 4.0ren bilakaera definitzen duen helburu nagusia baita.
Bileran zehar, Ekonomia Sustapen eta Berrikuntzako diputatu Saray Zaratek parte hartuko du, eta eraldaketa global horren esparruetako hainbat profesionalek ere parte hartuko dute, arlo digitala, berdea eta kulturala barne. Zehazki, BENTELER AUTOMOTIVE, PREOCA, TECNALIA eta UPV/EHUk gai erabakigarriak jorratuko dituzte mahai-inguruan, hala nola aro digitalera egokitzea, talentua eta iraunkortasuna. Erronka horiek bateratzeko bidea emango diete bertaratutakoei, beren errealitateak eta erronkak kontrastatzeko.
Saio interaktibo honen helburua da aukera-ildoak sortzea, iritziak eta kezkak kontrastatzea eta bertaratutakoei lankidetza estrategikoak ezartzeko aukera eskaintzea. Ramiro Gonzalez Arabako ahaldun nagusiak emango dio amaiera bilkurari.
Jardunaldi honetan parte hartzea zabalik dago erronka berrietan eta Araba 4.0ren aurrerabidean laguntzeko interesa duten Arabako enpresentzat, gure inguruneko lehiakortasunerako, berrikuntzarako eta garapenerako katalizatzaile gisa.
Informazio gehiago nahi izanez gero, bisitatu ekitaldiaren webgune ofiziala:
https://araba40.eus/agenda/sesion-interactiva-nuevos-retos-para-araba-4-0/
Araba 4.0ri buruz:
www.araba40.eus plataforma Arabako profesionalen eta enpresen zerbitzura dagoen kanal bat da, eta bertatik erraz eskura daitezke Lurraldean hainbat eragile garatzen ari diren 4.0 industriaren arloko baliabide eta ekimen guztiak. Plataforma honek erreferentzia bihurtu nahi du gai garrantzitsu honetan, eta Arabako enpresak gero eta globalizatuagoa eta digitalizatuagoa den mundu honetan lehiakorrak izaten jarraitzeko duen ekoizpen-gaitasuna handituko duten teknologiei buruzko informazioa, prestakuntza eta ezarpena ematen lagundu nahi du.
