Ostegunean sartuko da Alavabus-en 5. linean Agurain eta Gasteiz arteko ibilbidea

Arabako Foru Aldundiak datorren maiatzaren 4an, osteguna, sartuko du Agurain eta Gasteiz arteko ibilbidea, bi noranzkoetan, Gasteiz-Dulantzi-Araia Alavabusen 5. linean, Agurainen bizi diren arabarrei garraio publikoko zerbitzua hobetzeko. Ordutik, eguneko espedizio kopurua 17 eta 11 artekoa izango da, noranzko bakoitzeko, lanegunetan eta asteburuetan, hurrenez hurren.

"Zerbitzu berri horren erabiltzaileek BAT, BARIK eta MUGI txartelekin ordaindu ahal izango dute, eta, horrela, txartel horien bidez deskontuak eskuratu ahal izango dituzte. Txartel horien bidez Alavabus lineetako bidaiariei aplikatu ohi zaien deskontua txartel arruntaren prezioaren % 20koa da, baina Foru Aldundiak, gainera, aurten % 50eko murrizketa gehigarriari eutsiko dio ezohiko moduan", azaldu du gaur Arabako Foru Aldundiak.

Arabako Foru Aldundiko Bide Azpiegituren eta Mugikortasunaren Sailak, horrela, Nafarroako Gobernuak orain arte historikoki eman izan duen zerbitzu bat hartuko du bere gain, bi erakundeek 2021ean sinatu zuten hitzarmena aplikatuz. Foru Gobernuak joan den abenduan onetsi zituen Alavabusen 5. linea barne hartzen duen AR-01 Araba Erdialdea emakidaren enpresa emakidadunaren kontratu aldaketak, hartarako.

"Horiek horrela, maiatzaren 4tik aurrera, osteguna, Agurain eta Gasteiz arteko eguneko espedizio kopurua 17 eta 11 artekoa izango da, noranzko bakoitzeko, lanegunetan eta asteburuetan, hurrenez hurren. Lanegunetako lehenengo espedizioa 06:50ean aterako da Aguraindik Gasteizerantz, eta azkena 22:43an; Gasteiztik Agurainera joango den lehenengo autobusa, berriz, 5:50ean aterako da, eta azkena 22:30ean", gaineratu duenez.

Bi herrien arteko konexioan, gainera, zuzeneko bi espedizio daude, astelehenetik ostiralera goizeko lehen orduan; Arabako hiriburura 08:00ak eta 09:00ak baino lehen iritsi ahalko da, Arabako Lautadan bizi diren pertsonen mugikortasun beharrei erantzuteko.

Ordutegien taula osoa hemen dago eskuragarri:  www.alavabus.eus