Adimen-desgaitasuna eta laguntza behar duten 7 eta 30 urte bitarteko pertsonentzako programa bultzatzen jarraitzea. Programa hainbat aterpetxetan garatuko da.
Hala, Arabako Foru Aldundiak seigarren urtez jarraian bultzatuko du adimen desgaitasuna duten eta laguntza handia behar duten adin tarte horretako pertsonentzako atseden programa. Barriako eta Espejoko foru aterpetxeetan egingo da programa. Zerbitzua eskuratzeko eskaera aurkezteko eta eskatutako dokumentazioa bidaltzeko epea maiatzaren 5ean amaituko da. Informazioa IFBSprogramarespiro@araba.eus helbide elektronikora bidal daiteke, edo hitzordua eska daiteke helbide horretan bertan edo 945 151116 telefonora deituta. Programa egiten ari den bitartean, umeek eta gazteek harreman pertsonal berriak edukitzeko, gaitasunak garatzeko eta autonomia eta autodeterminazioa handitzeko ekintzak egingo dituzte, pertsona bakoitzaren beharrizanak ardatz hartuta. Monitore espezializatuek osatuko dute arreta taldea, eta programako parte hartzaileei behar dutenean laguntzeko eginkizuna izango dute, albait gehien parte hartu dezaten.
Ildo beretik, iturri berberek gaineratu dutenez, Gizarte Ongizaterako Foru Erakundeak egindako Atseden Programak 120 plaza eskainiko dizkie, ekainetik azarora bitartean, desgaitasuna duten haur eta gazteei bi aterpetxeetan asteburuetako egonaldiak egiteko. Normalean, haur eta gazte horiek familiaren laguntza sarean artatzen dituzte. Haren xedea da zaintzaileei aukera ematea atseden hartzeko adimen desgaitasuna duten beren senideak artatzean, indarberritzeko edo beren garapen pertsonalerako, edo bestela ezinezko gertatuko litzaiekeen premia egoeraren bati aurre egiteko.
