- Kutxatila bakarra. Horrela deitzen da Añanako Gatz Harana fundazioa eta Lantegi Batuak elkartu dituen proiektuari. Proiektu eta lankidetza honen helburua desgaitasunen bat duten pertsonekin lan egitea eta lankidetzan aritzea izan da, desberdintasunaren kontran urrats bat gehiago emanez.

Hain zuzen, atzo jakitera eman zutenez, Añanako Gatz Harana Fundazioak eta Lantegi Batuak elkarteak Añanako gatzaren paketatze-lanetan lagundu dute, desgaitasuna duten pertsonei lan berezia emateko. Horrela, eta komunikabideetara bidalitako komunikatu baten bidez, irabazi-asmorik gabeko bi erakundeek Añanako gatzaren kutxatila "bakarra" izeneko proiektuaren berri eman zuten.

Hala, eta zehaztu zutenez, Gatz Harana Fundazioaren sorreraren X. urteurrena eta gatzagak berreskuratzeko eta balioesteko lanen hasieraren XX. urteurrena ospatzeko egindako edizio pertsonalizatua eta mugatua da estutxe hori. Kutxatila horrek funtzio bikoitza du, gatza kontserbatzeaz gain, gatzontzi gisa ere erabil daitekeelako: "Luxuzko packaging bat da, barruan zein kanpoan, eta urre zuri hori gordetzeaz gain, gatzontzi gisa ere erabil daiteke", nabarmendu dute.

Horrela, proiektu horri esker, desgaitasunen bat duten hainbat pertsonak eta Lantegi Batuakeko langileek milaka kutxatila bakar paketatzen lan egin ahal izan dute asteetan zehar. Paketatze-lana Lantegi Batuak Otxarkoagan duen zentroan egin da (Bilbon). Bertako langileek 3.000 unitate baino gehiago muntatu zituzten, eta "esklusiboki" salgai egongo dira Gesaltza Añanako bisitarien zentroko dendan. "Gatz Harana Fundazioaren helburua Añanako gatzagak sozialki eta ekonomikoki berreskuratzea da, iraunkortasun irizpideekin", adierazi zuten.

Desgaitasuna duten pertsonei Bizkaian lan aukerak sortzen dizkien irabazi asmorik gabeko erakundea da Lantegi Batuak. "Haientzat inklusioa, ahalik eta garapen handiena eta bizi kalitate onena lortzeko xedea dugu. Gure bezeroen beharrizanak aukera moduan hartzen ditugu, desgaitasuna duten pertsonentzako lan aukerak sortzeko", azaltzen dute. Lurralde mailako garapenean inplikatzen dira: Eskualde guztietan presentzia duen zentro eta zerbitzu sare baten bidez, "bezero eta pertsonen gertutasuna bermatzen" dute, erakunde publiko eta gizarte eta enpresa erakundeekin batera lan eginez. Gainera, "beren prestakuntza eta gaikuntza ibilbidean laguntzen diegu, beharrezko babes indibidualizatuen bidez garapen profesionala lortzeko". Oraingo honetan, desgaitasuna duten pertsonentzako laguntza hori eta lanerako aukera hori Añanako Gatz Harana Fundazioaren lankidetzarekin egin da.

Fundazio horrek lan-aukerak eman nahi izan dizkie desgaitasuna duten pertsonei, lan-arloko aukera-desberdintasunak hausteko.