Bero itogarria astelehenean

Euskalmet euskal meteorologia agentziaren iragarpenaren arabera, astelehenean, ekainaren 22an, beroa izango da protagonista nagusia berriro, itogarria izango baita, maximoak 35-40 gradu artean utziz lurraldearen zati handi batean. Kostaldean, bereziki mendebaldean, haizea ipar-mendebaldetik ibiliko da eta baliteke beroa apur bat arintzea. Zerua hodei gutxirekin egongo da, behe-hodei tarte batzuekin kostaldean, hego-ekialdeko haizearekin.

Hiriburuetan, Baionan 21 gradu espero dira gutxienez eta 35 gehienez, Bilbon 22 gutxienez eta 40 gehienez, Donostian 20 gutxienez eta 38 gehienez, Gasteizen 17 gutxienez eta 40 gehienez eta Iruñean 19 gutxienez eta 40 gehienez.

Itsasbazterrean hego/hego-ekialdeko haizea ibiliko da, 2ko indarrarekin eta eguerditik aurrera ipar/ipar-mendebaldekoa 3koarekin; itsaso kizkurra eragingo du, eta arratsaldean itsaskirria. Ipar-mendebaldeko hondoko itsasoak metro erditik beherako olatuak altxatuko ditu. Itsasgorak 00:10ean eta 11:46an izango dira, eta itsasbehereak 05:23an eta 17:37an. Uraren tenperatura 21 gradukoa da eta ikuspena hamar kilometrotik gorakoa izango da.

" Zerua oskarbi edo hodei gutxirekin egongo da, erdi mailako hodei eta goi-hodei batzuekin. Hegoaldean, han hemenka, baliteke zaparrada trumoitsuren bat botatzea. Hego-ekialdeko haize ahul-bizia ibiliko da, bolada gogorrekin; arratsaldean ekialdekoa edo ipar-ekialdekoa ibiliko da. Kostaldean, gauean, tarteka ipar-mendebaldekoa ibiliko da. Tenperatura minimoak gutxi edo nahikoa igoko dira, eta maximoetan aldaketarik ez edo gutxi jaitsiko dira".