Euskaltzaindiak 2025eko azaroaren 28an euskaltzain oso Irene Arrarats hizkuntzalariak sarrera hitzaldia egingo du larunbatean, ekainaren 20an, Hernaniko (Gipuzkoa) udaletxeko osoko bilkuren aretoan, eta kazetaritzako hizkeraz eta hizkuntzaren manipulazio ideologikoaz arituko da, Akademiak ohar bidez iragarri duenez.
Ekitaldia 11:30ean hasiko da, eta atarikoan, Joxan Goikoetxea musikariak 'Haize hegoa' (Telesforo Monzon / Mikel Laboa) interpretatuko du. Ondoren, Andres Urrutia euskaltzainburuak eta Xabier Lertxundi Hernaniko alkateak ongietorria egingo diete bertaratutakoei eta, Miren Agur Meabe Akademiaren idazkariaren eta Erramun Osa idazkariordearen hitzak entzun ostean, Irene Arraratsek sarrera hitzaldia irakurriko du: 'Hitzak haizean, hitzak erauntsietan'.
Mintzaldiaren lehenbiziko partean, kazetaritzako hizkeraz jardungo du Arraratsek: kazetaritzako hizkerak nolako eragina duen hizkuntzan, oro har, eta hizkuntzaren bilakabidea nola islatzen den hizkera horretan; eguneroko prentsa eta estilo liburuak zein lagungarriak diren hizkuntza normalizazioan, euskara estandarraren probalekuetako bat direnez gero; zein garrantzitsua den Euskaltzaindia eta komunikabideak elkarlanean aritzea araugintza gizarteratzeko lantegian, eta abar. Bigarren partean, berriz, hizkuntzaren manipulazio ideologikoaz eta propagandaz arituko da.
Miriam Urkia Euskaltzaindiaren Gipuzkoako ordezkariak emango dio erantzuna Arraratsi, eta, azkenik, euskaltzain berriak karguaren zina egingo du eta euskaltzain osoaren domina, diploma eta ikurra jasoko ditu euskaltzainburuaren eskutik.
IRENE ARRARATS
Irene Arrarats Lizeaga 1967an jaio zen, Hernanin. Geografia eta Historiako lizentziaduna da, Deustuko Unibertsitatearen Donostiako campusean ikasia. Euskaltzaletasunak bultzatuta, alfabetatzeko eskolak hartu zituen Hernaniko AEKn, eta horrek espero gabeko bide bat zabaldu zion, hango irakasle batek proposatuta hasi baitzen Euskaldunon Egunkarian lanean, zuzentzaile gisa, lizentzia eskuratu eta berehala.
Beraz, "txiripa hutsez" ekin zion alor horri, berak esan izan duenez, baina aukera logiko eta koherentea izan da kontuan harturik euskaltzaletasuna izan duela bizitzaren ardatz nagusietako bat; gainera, behin baino gehiagotan azaldu izan du lanbidean probetxuzkoak izan zaizkiola askotan Historiako ikasketak, itxuraz zerikusi handirik ez badute ere.
Euskaldunon Egunkarian 1991tik 2003ra arte aritu zen, estilo zuzentzaile eta itzultzaile lehenbizi, eta euskara arduradun gero, kazeta itxi zuten arte. 2001ean Egunkariak argitaraturiko estilo liburuaren egileetako bat da. 2003az geroztik, berriz, Berriako euskara arduraduna eta estilo liburuaren zuzendaria da.
Euskaltzaindiari dagokionez, 2007an hasi zen parte hartzen Akademiaren lanetan, eta zenbait batzordetan aritzen da gaur egun: Hiztegi Batuko lantaldean (2007-2017), Exonomastika batzordean (2009-2024), Euskaltzaindiaren Hiztegia lantaldean (2017-) eta Euskara Batuaren Eskuliburuaren Batzordean (2017-).
Euskaltzaindiaren 'Arantzazutik mundu zabalera: 1968-2018' nazioarteko biltzarrean ere parte hartu zuen. Betidanik, bere buruari ezarri dion eginbidea da zubi-lana egitea euskal prentsaren eta Euskaltzaindiaren artean: Akademiak seinalaturiko bidea urratzen ibiltzen da eguneroko prentsan, eta euskaraz lan egiten duten profesionalen ikuspegia eraman ohi du Euskaltzaindiko batzordeetara.
