Landaketa berriak egin dituzte Bilbon "tximeleten oasiak" indartzeko

Bilbok hiri biodibertsitatearen aldeko apustua indartu du "tximeleten oasietan" landaketa berriak eginez. Ekimena Gurutze Gorriak garatu du Bizkaian, Bilboko Udaleko Mugikortasun eta Jasangarritasun Sailarekin lankidetzan eta Zerynthia Elkarteak sustatuta, eta hiri inguruneetan tximeletak eta beste intsektu polinizatzaile batzuk egotea da bere helburua.

Bilboko Udaletik jakinarazi dutenez, "tximeleten oasiak" Sarrikoko Salestarren lorategietan, Ibaieder parkean (Abusu) eta Eskurtze parkean (Irala) daude. Espazio horiek lehendik ere baziren parke horietako lorategiak, eta orain egin dena izan da tximeletak eta beste intsektu polinizatzaile batzuk elikatzen eta ugaltzen laguntzen duten landare espezieak landatu.

Beste intsektu polinizatzaile batzuk bezala, tximeletek bereziki nabaritzen dituzte ingurunearen alterazioak. Espezie horiek hiri inguruneetan dituzten mehatxu nagusietako batzuk euren habitatak galtzea edo degradatzea, pestizidak erabiltzea eta hirigintza prozesuen inpaktua dira.

Javier Garaizar Bizkaiko Gurutze Gorriko Ingurumen arloko zuzendari eta boluntarioaren hitzetan, "esku hartze txikiak eginda, halakoxeak baitira gure landaketak, hiri parkeak espazio biziagoak eta ekosistemen orekarako baliotsuagoak diren espazio bihur ditzakegu".

Ekimenaren helburua da biodibertsitatea herritarrengana hurbiltzea eta ziklo naturalekiko errespetua sustatzea. Espazio horien bitartez, polinizatzaileek ekosistemetan duten zeregina ikusi ahal izango dute bisitariek, eta hobeto ulertu ahal izango dute ingurumen orekarako duten garrantzia.

Nora Abete Bilboko alkateorde eta Mugikortasun eta Jasangarritasun Saileko zinegotziak nabarmendu duenez, "horrelako ekimenek natura auzoetara hurbiltzen eta herritarren eta hiriko berdeguneen arteko lotura indartzen laguntzen dute".

"Tximeleten oasiak" eremu eguzkitsuetan kokatu dira, haizetik babestuta, baldintza horiek intsektu horien ugalketa eta babeslekua errazten baitute. Gune horietan, Bilboko klimara egokitutako espezie autoktonoak landatu dira, hala nola erromeroa, ezkaia, erruda usaintsua edo mihilua, tximeleta helduentzako zein beldarrentzako elikagai gisa balio dutenak. Ez dira espezie exotikoak landatuko, oreka ekologikoa babesteko eta tokiko florari laguntzeko.

Lehenengo hilabeteetan, landareen hazkuntza errazteko ureztatze egokia bermatuko da; ondoren, espezie autoktonoak direnez, modu naturalean garatu ahal izango dira. Espazio horien mantentze lanak eta jarraipena Gurutze Gorriko boluntarioen ardura izango dira, eta aldian behin ikuskatzeak egingo dituzte landarediaren hazkundea eta oasiaren egoera gainbegiratzeko. Gainera, zurezko markoak jarri dira landaketak babesteko eta egon litezkeen kalteak saihesteko.