Mikel Sanchez traumatologo eta zirujauak jasoko du 2026ko Arabako Domina

Arabako Foru Aldundiak erabaki du Mikel Sanchez Alvarez traumatologo eta zirujau gasteiztarrari ematea 2026ko Arabako Domina, foru erakundeak ematen duen aitortza saririk handiena. Ramiro Gonzalez Arabako diputatu nagusiak proposatuta, foru gobernu kontseiluak aitortza egin dio "ibilbide profesional apartari, bikaintasun klinikoari, berrikuntza zientifikoari eta pertsonen osasuna eta bizi kalitatea hobetzeko konpromisoari. Arabar sentitzearen harrotasunaren adibide ezin hobea da". Gonzalezek apirilaren 28an egingo den ekitaldi batean emango dio saria, San Prudentzio egunean.

Ramiro Gonzalezek berak astearte honetan adierazi duenez, foru erakundeak nabarmendu nahi du Mikel Sanchezek agerian utzi duela "Gasteiztik munduko medikuntzaren liderra" izan daitekeela, "sustrai arabarrak galdu gabe". Esan du horren adibide garbia dela Araban erreferentziazko zentroa den MiKS Ospitalea bultzatzearen aldeko apustua, "ezagutza sortzen, talentua erakartzen eta kalitatezko enplegua garatzen laguntzen duena".

Horrela, Arabako Foru Aldundiak Mikel Sanchezi Arabako Domina emango dio "bere ibilbide profesionalaren eta Arabak medikuntza eta zientzia arloan duen prestigioari eta proiekzioari egindako ekarpen eredugarriaren aitortza gisa". "Haren dedikazioaren, lidergoaren eta etorkizun senaren eredua Arabako gizarte osoarentzat harro egoteko arrazoi bat izateaz gain osasun arloko profesionalen belaunaldi berrientzako pizgarri bat da", nabarmendu du.

Mikel Sanchez Gasteizen jaio zen 1956an. Bordeleko Unibertsitatean egin zituen medikuntza ikasketak, eta Medikuntza eta Kirurgian lizentziatu zen Euskal Herriko Unibertsitatean (EHU), 1979an. Traumatologia eta kirurgia ortopedikoan espezializatu zen Gasteizko Santiago Apostol ospitalean, eta, harrezkero, erreferente bihurtu da bere espezialitatean.

Aitzindaria izan da Kirurgia Artroskopikoaren aurrerabidean Europan, eta lehen zirujaua izan da ulertzen Hazkunde Faktoreetan Aberatsa den Plasmak (PRFC) zer potentzial terapeutikoa duen traumatologiaren eta lokomozio aparatuaren arloan.

Kirurgia Artroskopikoko Unitatea sortu zuen 1995ean Gasteizen, mundu osoko espezialistekin lankidetzan aritu da, 170 artikulu zientifiko baino gehiago argitaratu ditu inpaktu handiko aldizkarietan eta 10.000 aipamen inguru ditu ikasketa akademikoetan.

Mikel Sanchezek hainbat pertsona ospetsu tratatu ditu, eta duen ospea sendotu du hemen zein nazioartean. Hala, erreferentziazko biltzar eta konferentzietan hizlari izan da, ikerketa proiektuen buru izan da, eta nazioarteko hamar patente inguru garatzen lagundu du.

Standfordeko Unibertsitateko 'World's Top 2% Scientists Ranking' delakoan sartzeak munduko kirurgialari ortopediko eraginkorrenen artean kokatzen du. Bere lan ibilbidean zehar, erakutsi du "asmo sendoa" duela "ezagutza partekatzeko, medikuntzaren aurrerabidea bultzatzeko eta pazienteen bizi kalitatea hobetzeko, soluzio terapeutiko berritzaile eta eraginkorren bidez".

Bere lan ibilbidean zehar, Sanchezek aitortza ugari jaso ditu, besteak beste, Gasteizko Urrezko Domina (2007), Kirolari aplikatutako Arteen eta Zientzien 2014ko Espainiako Sari Nazionala (2015), Arabako Sendagileen Elkargo Ofizialaren Urrezko Domina (2023) eta Euskal Autonomia Erkidegoko Medikuntzaren Errege Akademiak Akademiko Oso izendapena (2024).

MIKS OSPITALEA

Mikel Sanchez doktoreak Gasteizko MiKS ospitalean egiten du bere laguntza eta ikerketa lana 2025etik. Berak sustatu eta zuzentzen du erreferentziazko zentro berritzailea, eta arreta osoa ematen die umeen zein helduen sistema muskuloeskeletikoaren patologiei.

MiKS ospitalean mediku zerbitzu aurreratuak eta medikuntza birsortzailearen arloko ikerketa, prestakuntza eta dibulgazioaren jarduera trinkoa uztartzen dira.

Gaur egun, bost unitate espezializatu ditu: kirurgia artroskopikoa, traumatologia eta kirurgia ortopedikoa, mina, terapia biologiko aurreratua eta ikerketa traslazionala. Bertan, medikuntzan, erizaintzan eta ikerketan goi-mailako kualifikazioa duten profesional askok lan egiten dute, eta horrek bermatzen du bikaintasunezko arreta eta etengabeko berrikuntza ingurunea izatea.