Kontsumobidek ibilbidea hasi du EAEko kontsumitzaileen informaziorako udal bulegoetan beharrak eta erronkak ezagutzeko

Kontsumobide Kontsumoko Euskal Institutuko zuzendari Ana Maria Sanchez Herraezek ibilbide planifikatu bati ekin dio astearte honetan, Euskal Autonomia Erkidegoko (EAE) kontsumitzaileen informaziorako udal bulego guztiekin biltzeko. Ekimenaren helburua da bulego horiek herritarrei arreta emateko eguneroko lanean dituzten beharrak eta erronkak bertatik bertara ezagutzea.

Ibilbidearen bidez, Kontsumobidek jakinarazi duenez, udal zerbitzuekiko koordinazioa indartu nahi da, eta erakundearen lana hobetzeko aukera ematen duten jarduerak hauteman. Bisitetan, zuzendariak bilerak izango ditu teknikariekin eta udal arduradunekin, proposamenak jasotzeko, hobekuntza arloak identifikatzeko eta kontsumitzaileen eskaera ohikoenak aztertzeko lurralde bakoitzean.

Kontsumobidetik nabarmendu dute kontsumitzaileen informaziorako udal bulegoak "funtsezko zutabeak" direla herritarrei arreta zuzena emateko. 2025ean, kontsumoaren arloko 41.390 kontsulta erregistratu ziren guztira Euskadin, eta horietatik 26.128 udal bulegoetan hartu zituzten. "Horrek agerian uzten du funtsezko zeregina dutela kontsumitzaileentzako lehen harreman puntu gisa", adierazi dute.

Halaber, 2025ean 27.218 erreklamazio, kexa eta salaketa izapidetu ziren kontsumo bulegoen bitartez. Horietatik 10.684 udal buleghek kudeatu zituzten, "eta kontsumitzaileen eskubideen defentsa eraginkorrean eta toki eremuko gatazken ebazpenean duten papera indartu zuten".

Astearte honetan hasitako ibilbidearen bidez, Kontsumobidek "kontsumitzaileen eskubideak babesteko konpromisoa" berresten du, "gertuko arreta sare eraginkorra eta udalerri bakoitzaren beharretara egokitua bultzatuta". Oinarrizko helburua da bermatzea herritarrek kontsumitzaile gisa dituzten eskubideak berme guztiekin erabili ahal izatea, bizilekua edozein dela ere.

Kontsumobideren ustez, "funtsezkoa" da erakundeen arteko lankidetza eta tokiko administrazioekin batera lan egitea, "Euskadiko kontsumitzaileen informazio, aholkularitza eta defentsa zerbitzuak hobetzen jarraitzeko".