'Baba Yaga eta sorginkerien liburua' filma estreinatuko da Euskal Autonomia Erkidegoko (EAE) zenbait zinema aretotan ostiralean, otsailaren 13an, Zinema Euskaraz programaren eskutik. Publiko orokorrari zuzendutako film errusiarra euskarara bikoiztuta ikusi ahal izango da, aurten euskaratuta ikusiko den hirugarren lana izanik.
Zineuskadi elkarteak jakinarazi duenez, Eusko Jaurlaritzako Kultura eta Hizkuntza Politika Sailaren babesa duen Zinema Euskaraz programaren helburua euskal ikus-entzunezkoen sektoreari laguntzea da, haur zein gazteei zuzendutako filmak bikoiztuz eta zinemagintzan euskararen hedapena bultzatuz.
Bada, 'Baba Yaga eta sorginkerien liburua' filma Cines Gorbeia (Gasteiz), Florida Zinemak (Gasteiz), Niessen (Errenteria) eta SADE Antiguo Berri (Donostia) aretotean ikusi ahalko da. Datozen hilabeteetan beste film batzuk ere izango dira Zinema Euskaraz programaren barruan, hala nola 'Chirp, Honey Hillseko ikertzailea', 'Ninja a cuadros: el origen' eta 'Tafiti'.
BESTALDE, Maider Etxebarria Gasteizko alkateak ostiral honetan iragarri du berriro aurkeztu dutela Frantziako Tourreko 'Ville à Vélo' (Hiria Bizikletan) aitortzetarako hautagaitza, 2023an lortutako arrakastaren ondoren. Urte hartan, Gasteizek sari gorena lortu zuen (lau bizikleta), Frantziako lasterketako etapetako baten irteera hartu ondoren.
Etxebarriak gogorarazi du Gasteizko Udalak bizikleten mugikortasunaren aldeko "apustu irmoa" egiten jarraitu duela ordutik, espazio publikoa eraldatzeko ardatz gisa. Konpromiso hori nazioartean aitortu dute, Copenhagenize Index 2025eko Top 30 zerrendan sartu baitute; sailkapenean, mundu mailan 28. postuan dago, eta Espainiako hirien artean lehenengoa da.
Azken urteotan, Gasteizek nabarmen handitu ditu bizikleta azpiegiturak. Horrela, 500 aparkaleku seguru izatetik auzo guztietan banatuta dauden 1.300 aparkaleku baino gehiago izatera igaro da, MugiBIKE bizikleta elektrikoaren sistema publikoa jarri da martxan (24 orduz dago abian), eta Gasteizko Udalak 9 milioi euro inguru inbertitu ditu bizikleta bideetan, aparkalekuetan, konponketa guneetan eta espazio publikoan egindako hobekuntzetan.
