Arabako Foru Aldundiak EDA Drinks & Wine Kampusa bultzatu du, Fundazioari 8 milioi euroko zuzeneko dirulaguntza emanez

Arabako Foru Aldundiko Gobernu Kontseiluak EDA Drinks & Wine Kampus Fundazioari 8.000.000 euroko zuzeneko dirulaguntza ematea onartu du, Arabako Lurralde Historikoan Ardoaren eta Edarien Bikaintasun Zentroa eraikitzeko gastuak finantzatzeko.

Erabakia lankidetza-hitzarmen baten bidez egituratzen da, eta hitzarmen horrek proiektuaren -egikaritze, jarraipen eta justifikazio-esparrua finkatzen du.

Talentuaren garapenerako, prestakuntza aurreraturako, ikerketarako eta berrikuntzarako (I+G+b) eta ekintzailetza bultzatzeko erreferentzia-gune bihurtzeko asmoz sortu da zentroa, Arabarentzat estrategikoa den sektore baten inguruan ezagutza, enpresa eta lurraldea lotuz.

Dirulaguntza honela banatzen da urteka: 2025, 264.001 euro; 2026, 4.388.830 euro; 2027, 3.347.169 euro. Proiektua funtzio osagarriak dituzten bi egoitzatan garatuko da: Gasteizen, prestakuntzara eta ezagutzaren proiekziora bideratutako egoitza bat egongo da, ikaskuntza aplikaturako eta dibulgaziorako espazioekin: ikasgelak, sukaldeak, auditorioak, showrooms eta winebar bat, besteak beste.

Guardiako egoitza, ingurune esperimentalago gisa ulertzen dena, berrikuntza-laborategi izateko bokazioarekin: ikasgelak, ekitaldietarako guneak eta eremu espezifikoak, hala nola mikrodestilategi bat eta enologiako berrikuntza-laborategi bat.

Akordio horren bidez, Arabako Foru Aldundiak ardoaren eta edarien kate osoari balioa gehitu nahi dion proiektu baten aldeko apustua indartu nahi du -prestakuntzatik eta berrikuntzatik hasi eta talentua erakartzeraino eta enpresa-ekimen berriak sortzeraino-, eta onartutako hitzarmenean zehaztutako gobernantzan eta gauzatze-egutegian oinarritzen da.