Zinebik Zinebiskopio atala estreinatuko du 67. edizioan, bokazio soziala eta hiriarekiko elkarrizketa indartzeko gunea

Zinebi Bilboko Dokumentalen eta Film Laburren Nazioarteko Jaialdiak Zinebiskopio sail berria inauguratuko du 67. edizioan, bere bokazio soziala eta hiriarekiko elkarrizketa indartzeko gunea.

"Hausnarketarako eta topaketarako foro gisa sortua, Zinebiskopiok eraldaketarako, elkarrizketa sozialerako eta memoria kolektiboa eraikitzeko tresna gisa ulertzen du zinema", adierazi dute jaialdiaren arduradunek.

'Periskopio' edo 'kaleidoskopio' bezalako terminoetan oinarrituta, atal berriaren izenak bere begirada irekia nabarmendu nahi du, "zinematik ingurura begiratzea, ez zinemarantz".

Zinebiskopio sailaren saioak BBK Salan izango dira, eta proiekzioak eta zinemagile, espezialista eta gizarte eragileekin solasaldiak uztartuko ditu, "ikus-entzunezkoen eta egungo errealitatearen arteko zubiak eraikitzeko helburuarekin".

Atal berriko programazioa bost ardatz tematikotan egituratuko da, eta gai sozialak, kulturalak eta giza gaiak jorratuko dituzte ikus-entzunezko sorkuntzatik abiatuta. Saio guztiek proiekzioaren ondorengo solasaldia izango dute.

Bada, 'Georgiako komunitatea eta integrazio kulturala' ardatzean, Noé Sulaberidzeren 'Dos Iberias' ikusi ahalko da (azaroak 23); 'Artea eta zinema gizarte inklusio eta belaunaldien arteko elkarrizketa gisa' atalean, Aitor Elorriaga Torreren 'Esa maravillosa niebla' (azaroak 23), eta 'Dokumentala, memoria kolektiboaren euskarri eta eraikitzaile gisa' ardatz tematikoan, Basilio Martin Patiñoren 'Canciones para después de una guerra' (azaroak 24).

Azkenik, 'Memoria historikoaren berrikuspena' izeneko sailean, Jesus Rocandioren 'La flor del almendro' izango da ikusgai azaroaren 25ean, eta, azkenik, 'Ikus-entzunezko sorkuntza eta osasun mentala' ardatz tematikoak Jose Corbachoren eta Catalina Solivellasen 'En un lugar de la mente' azaroaren 26an.