LAB sindikatuak salatu du Sidenor enpresak lau langile kaleratu dituela Gasteizko lantegian "euren eskubideak aldarrikatzeagatik", eta enpresaren jarrera salatu eta kaleratuak berronartzea exijitu du.

LABek prentsa ohar bidez adierazi duenez, duela egun batzuk ohartarazi zuen Sidenorren Gasteizko behargin batzuk "kaleratze arriskuan" zeudela, "euren eskubideak aldarrikatzeagatik".

"Lau langile hauek, beren kategoriaren araberako funtzioak egiten ari zirela ulertuta, plus bat jasotzen hasi ziren urtarrilean, sei hilabeteren ostean kontsolidatu zena", azaldu du.

Bada, sindikatuak salatu du abuztuan enpresak ordaintzeari utzi ziola, irailean plusa kendu zuela eta urri hasieran jasotako dirua nominatik kendu zietela esan ziela langileei.

"Horretan gelditu ez, eta enpresak espedientea ireki zien pasa den astean, eta LABek jakin berri du kaleratu egin dituztela. Hau onartezina da. Langileek beren eskubideak bete daitezen ohiko bideak hartu dituzte, eta enpresaren zuzendaritzak, Basauritik, kaleratzeko agindua eman du", nabarmendu du.

Jarrera "antisindikala eta antidemokratikoa" dela ohartarazi du, eta "oinarrizko joko arau guztiak apurtzea" esan nahi duela. Ildo horretan, galdetu du langileek "edozein urratze" onartu behar ote duten eta "ezin al duten dagokien ezer eskatu".

LABek ziurtatu du enpresa urtarriletik dela egoeraren jakitun, "Gasteizen behintzat", eta lau langileak kaleratzeko erabakia "guztiz gehiegizkoa" dela.

"Genozidioarekin kolaboratzeagatik ikertua izaten ari den enpresako buruak, aste honetan Euskal Herriko pertsona aberatsenen zerrendan sartu denak, bere aberastasuna langileon lan eskubideen bizkar egin du. Noiz arte jarraituko dute zuritzen Jaurlaritzatik pertsonaia hau? Agerikoa da nola lortu duen bere aberastasuna metatzea", adierazi du.

Azkenik, sindikatuak nabarmendu du "ekintza sindikalaren bitartez erantzun" behar dela, kaleratuak berronartuak izan behar direla, eta "jazarpen sindikala amaitu" behar da. Komitearen baitan, elkarlanean, tamainako erantzuna proposatuko du LABek.