Arabako Foru Aldundiak herritarrak gonbidatu ditu Hirigintzaren Nazioarteko Eguna ospatzera, eta parte hartzeko, sormenerako eta hezkuntzarako jarduerez betetako jardunaldia antolatu du Gasteizen larunbaterako, azaroaren 8rako, Kalera hirigintzarekin! lelopean. Hiri plangintza herritarrengana hurbiltzea da helburua, modu ludiko, irisgarri eta emozionalean.

Izan ere, foru erakundearen arabera, hirigintza ez da gai teknikoa soilik, baizik eta baita "komuna dena zaintzeko tresna, nola bizi eta elkarrekin bizi nahi dugun irudikatzeko tresna". "Elkarrizketa irekia da erakundeen eta herritarren artean, existitzen denaren eta etortzeke dagoenaren artean, eta elkarrizketa horrek hizkuntza berriak behar ditu, hurbilagoak, gizatiarragoak", azaldu du.

"Elkarrekin imajinatzea da gure ingurunea eraldatzeko lehen urratsa", gogorarazi dute Arabako Aldunditik, eta herritar guztiak animatu dituzte parte hartzera eta "egun batez hirigile bihurtzera"

Horrela, larunbatean, "Arabako hiri etorkizuna irudikatu eta eraikitzeko" topagune bihurtuko da Gasteizko Probintzia plaza, 10:00etatik 14:00etara, tailer, erakusketa, antzerki eta dantza emanaldiekin, besteak beste.

"Elkarrekin imajinatzea da gure ingurunea eraldatzeko lehen urratsa", gogorarazi dute Arabako Aldunditik, eta herritar guztiak animatu dituzte parte hartzera eta "egun batez hirigile bihurtzera".

BESTE DATU BATZUK

Bestalde, Gasteizko Udalak Errekatxiki pasealekua birnaturalizatu eta biziberrituko du Judimendi auzoan, 'Hobetuz' programaren barruan. Lanek 265.730 euroko inbertsioa eta bost hilabeteko gauzatze epea dituzte, eta igarotzeko espazio bat "pasealeku berde, aktibo eta bizikidetzarako pentsatua bihurtuko dute".

Hala jakinarazi dute ostegun honetan proiektuaren aurkezpenean Beatriz Artolazabal Gasteizko alkateorde eta Espazio Publikoaren eta Auzoen zinegotziak eta Miren Fernandez de Landa Gobernu Irekiaren eta Gizarte Etxeen zinegotziak.

'Gasteiz Hobetuz' programaren baitan bildutako esku hartzea da, eta, horren bidez, gaur egun batez ere pasatzeko erabiltzen den espazioa "toki bizi, atsegin eta auzokoek egunero erabili ahal izateko egokia bihurtu nahi da".