Jaurlaritzak 400.000 euro banatuko ditu kultur ondare immateriala babesteko proiektuen laguntzetan

Eusko Jaurlaritzako gobernu kontseiluak egindako bileran onartu du euskal kultura-ondare immateriala babesten laguntzen duten proiektuak edo jarduerak gauzatzeko 2025-2026ko diru laguntzen deialdia, eta guztira 400.000 euro banatuko ditu, iazko kopurua bikoiztuz.

Jaurlaritzatik jakinarazi dutenez, deialdiaren baitan diruz lagundu daitezkeen jarduerak hiru lerrotan banatu dira: ikerketa, katalogazioa, analisia eta planak alde batetik, ondare immateriala sortzeko eta zabaltzeko jarduerak egitea dakarten proiektuak bestetik, eta toki erakundeek ondare immateriala sustatzeko eta zabaltzeko egindako jarduerak azkenik.

Hala, eta ildo horretatik jarraituz, Eusko Jaurlaritzatik azpimarratu dutenez, diruz lagundu ahal izango dira euskal kultur ondare immateriala babesten eta babesten laguntzen duten dokumentazio, ikerketa, erregistro, sustapen, sorkuntza, berraktibazio eta ospakizun proiektuak, baldin eta Euskal Kultura Ondareari buruzko 6/2019 Legearen 11. artikuluan ezarritako hamaika kategorietako edozeinetan definitutako ondasunetan oinarritzen badira eta 2025eko urtarrilaren 2tik 2026ko urriaren 30era bitarte egiten badira.

DIRU LAGUNTZAK

Diru laguntza jaso ahal iuzateko eskabideak egiteko epea hilabetekoa izango da agindua argitaratzen den egunaren biharamunetik kontatzen hasita.

Eusko Jaurlaritzako Kultura eta Hizkuntza Politika Sailak zortzi proiekturi lagundu zien euskal kultura-ondare immateriala babesteko 2024-2025eko diru laguntzen deialdian, ondorioztatu dute Eusko Jaurlaritzatik.