Arabako Errioxako ardoen, txakolin, sagardo eta destilategien 20 euskal upategiren ordezkaritza batek Japonian 'Basque Wine' edariak sustatzeko misio komertzialean parte hartu du aste honetan. Eusko Jaurlaritzako Elikadura, Landa Garapen, Nekazaritza eta Arrantza Sailak antolatu du bidaia, Hazi Fundazioaren bitartez.

Bada, ekimenaren sustatzaileek jakinarazi dutenez, merkataritza bisitaren barruan antolatutako ekintzen helburu nagusia Asiako herrialdean sartu nahi duten enpresentzako inportatzaileak bilatzea izan da, baita Tokio eta Osaka moduko hiri nagusietan edariak merkaturatzen laguntzea ere.

Parte hartu duten enpresek positiboki baloratu dute misioaren emaitza, lan bilera pertsonalizatuen, zuzeneko merkataritza ekintzen, 'showroom'-en eta dastatze profesionalen bidez, beren produktuak zuzenean ezagutarazi ahal izan baitizkiete inportatzaileei, banatzaileei eta preskriptoreei. Horri esker, dagoeneko Japonian merkaturatzen ari diren markak sustatu eta erreferentzia berriak sartu ahal izan dituzte.

Misio komertzialaren bidez, euskal upategiak 200 pertsona inguruko publiko profesionalarengana iritsi dira, inportatzaile, banatzaile, txikizkari, sommelier eta abarren artean. Gainera, 40 B2B bilera egin dituzte enpresen artean, eta zuzeneko 65 ekintza komertzial inportatzailearekin.

Jaurlaritzaren arabera, euskal produktuek Japonian harrera ona izan dute eta merkatu hori esportazioetarako helmuga gisa finkatzeko aukera dago. Horrenbestez, euskal kalitatezko edariak japoniar merkatuan kokatzeko beharrezkoak diren ekintzak babesten jarraitzeko konpromisoa hartu du Elikadura, Landa Garapen, Nekazaritza eta Arrantza Sailak.

Bidaia Eusko Jaurlaritzaren Euskadiko Elikagaien Industriarako 2025 Sustapen Planaren baitan dago. Horrela, planak jarraipena eman die 'Basque Wine' edariak sustatzeko ekintzei eta euskal mahastizaintza eta ardogintzaren sektorerako merkatu berriak bilatzeari.