Arabako Foru Aldundiko Enplegu, Merkataritza eta Turismo Sailak 146.736 euroko dirulaguntzak emango dizkie aurten turismo sektoreko elkarteei, bidaiariei eskaintzen dizkieten zerbitzu eta esperientzien eskaintza modernizatzeko eta hobetzeko proiektuak finantzatzeko.
Arabako Diputazioak jakinarazi duenez, erakunde onuradunak turismo ostatuen elkarteak, Arabako zenbait udalerritako sustapen elkarteak, kultura elkarteak eta turismo zerbitzuak eskaintzen dituzten fundazioak dira.
Cristina González Enplegu, Merkataritza eta Turismo Saileko foru diputatuak azaldu duenez, tokiko eta eskualdeko elkarteak "funtsezko eragileak dira turismo eskaintza osoa eta askotarikoa eratzeko eta, horrela, Araba kalitatezko helmuga gisa sendotzeko. Horregatik, laguntza ematen diegu eskaintza hori hobetzeko, baliabide materialak eta zerbitzuak modernizatzeko eta sustapen ekintzak egiteko".
"Ekitaldien antolaketa ere finantzatzen dugu, oso garrantzitsuak baitira bidaiariak erakartzeko eta sektorea dinamizatzeko. Aurten, besteak beste, finantzatuko ditugu enoturismoarekin eta landa inauteriekin lotutako ekitaldiak, eta bisita gidatuak", gehitu du Gonzálezek.
Enplegu, Merkataritza eta Turismo Sailak bi deialdiren bidez ematen ditu laguntza ekonomiko horiek. Lehenengoak 130.772 euroko zuzkidura du, eta elkarteei eta fundazioei honako hauek finantzatzeko da: ekitaldiak antolatzea, kongresuak egitea, publizitatea kontratatzea, web orriak eguneratzea eta zenbait jarduera turistiko eskaintzea (bisita gidatuak, tailerrak, ibilbideak...).
LAGUNTZA LERROAK
Horrela, laguntza lerro horren bitartez, besteak beste, Samaniego in Wine eta Villabuena Wine Fest ekitaldi enoturistikoak finantzatuko dira, Samaniegoko Turismoa Sustatzeko Elkarteak eta Eskuernagako Sustapen Elkarteak antolatuak, hurrenez hurren; eta Billodako landa inauteriak eta Iruña Okako Arkiz Kultura Elkarteak antolatzen duen Ilargiaren Jaia.
Finantzatuko diren beste proiektu batzuk honako hauek dira: kultura eta arte jarduerak, eta bideomapping Ametsen Hariztian (Kexaa, Aiaraldea), Añanako Gatz Harana Fundazioaren eta Artium Fundazioaren bisita gidatuak eta ekitaldiak, eta Arabako Turismo Ostatuen Elkarteak (Arabatur) sustatzen duen Hoststik turismo ostatuen sektorearen kongresua.
