Qasem Budair palestinarrak Zisjordaniatik defendatu du doktore tesia EHUn

Qasem Budair 30 urteko palestinarrak Zisjordaniatik sarean defendatu zuen bere doktore tesia joan den uztailaren 7an Euskal Herriko Unibertsitatean (EHU), gatazka armatuak ez baitio utzi Euskal Herrira bidaiatzea aurrez aurreko defentsa egiteko.

EHUko iturriek jakinarazi dutenez, unibertsitateko araudiak aurrez aurreko defentsa eskatzen du kasu orokorretan, baina Palestinakoa bezalako egoera berezi batean, sareko defentsa baimentzea erabaki zuen EHUk. Neurri handi batean, bere tesi zuzendari Juan Manuel Velazquez Gardeta irakaslearen inplikazioari esker izan da posible.

Ikertzailea Zisjordaniako Tulkarem hirian bizi da eta gerra testuinguruan egin behar izan zuen bere ikerketa, Israelek ezarritako murrizketek eragotzi egin baitzioten Euskal Herrira bidaiatzea. Qasem Budairren beraren hitzetan, "Tulkaremen bizitzea setio egoeran bizitzea bezalakoa da", eta egoera horretan doktoretza egitea "erronka akademikoa baino gehiago, erresistentzia modu bat da".

Budairrek eta bere tesiaren zuzendariak egoera oso konplexuari aurre egin behar izan diote. Hasiera batean, doktoregaiak bisa eskatu zuen Espainiako Kontsulatuan, baina Palestina, Iran, Israel eta AEBen arteko gatazka militarraren ondorioz, eskaera guztiak eten egin zituzten eta ezin izan zuen bidaiatu.

Ondorioz, Juan Manuel Velazquezek unibertsitateko doktorego batzordeari sareko defentsaren aukera eskatu zion, egoera salbuespenezkoa zela argudiatuta. Onartu ostean, hurrengo erronka Interneteko konexioa bermatzea izan zen, eta tesiaren egunean etenik egon ez izana funtsezkoa izan zen arrakastaz gauzatzeko defentsa.

Velazquezek adierazi duenez, "Qasemen egoera benetan konplexua izan da. Ez bakarrik fisikoki hona etortzerik ez duelako izan, baizik eta okupazio militarrak eta burokrazia murrizketek zaildu egin dutelako prozesu akademikoa ere".

TASAK

Besteak beste, tasa ordainketak egiteko zailtasunak nabarmendu ditu, Palestinatik kanpora transferentziak blokeatuta daudelako. Ikertzaileak Palestinan bizi duen egunerokotasuna ere ez da arrunta. Budair Tulkarem hirian bizi da, eta, Jerusalemdik gertu dagoen arren, kontrol postuek eta mugikortasun murrizketek eragiten dute lanera edo ohiko jardueretara joatea ordutegiz eta segurtasunez baldintzatuta egotea.

"Behin, kontrolgune batean zortzi ordu eman nituen, lanera iristeko ahaleginean. Autobuseko gazte batek bere mugikorra utzi zidan, eta aukera baliatu nuen doktore ikerketako materiala berrikusteko. Palestinan, ikastea bera ere erresistentziaren adierazle bihurtzen da askotan", adierazi du Budairrek.

Hala ere, egoera horretan bertan ikertu, lan egin eta tesi bat amaitu du ikertzaile palestinarrak, EHUn maila akademiko gorena lortuz.