Euskadin goi mailako kirol lehiaketak antolatzen laguntzeko 300.000 euro banatuko ditu Jaurlaritzak

Eusko Jaurlaritzak 300.000 euro banatuko ditu Euskadin goi mailako kirol lehiaketak antolatzeko diru laguntzetan, iaz baino 100.000 euro gehiago, astearte honetako gobernu bileran onetsitako deialdiaren arabera.

Zehazki, Jaurlaritzaren arabera, goi mailako kirol lehiaketatzat joko dira nazioarteko eremua eta izaera duten lehiaketak, eta deialditik kanpo geratuko dira kirol erakusketa edo ikuskizunak eta nazioarteko izaera ez dutenak.

Diru laguntza eskatzeko epea hilabetekoa izango da deialdia Euskal Herriko Agintaritzaren Aldizkarian (EHAA) argitaratu eta biharamunetik hasita.

2024ko deialdian goi mailako 29 kirol proba lagundu ziren, besteak beste, Zornotzako Nazioarteko Krosa, Zegama-Aizkorri mendi maratoia, Karrantzako eta Igorreko nazioarteko ziklokrosak, Eibarko Hiria Txirrindularitzako Sari Nagusia, emakumezkoen Araba World Tennis Tour, Durango-Durango Emakumeen Saria edota Ordiziako Klasikoa.

BESTE GAI BATZUK

Bestalde, Tuvisa Gasteizko hiri garraioko udal konpainia hainbat autobusetan probatzen hasi da jada bidaia banku txartelaren eta Android eta iOS gailu mugikorren bidez ordaintzea ahalbidetuko duen teknologia.

Gasteizko Udaletik jakinarazi dutenez, autobusetan probak amaitu ondoren, eguneko (1,40 euro) eta gaueko (1,85 euro) bidaiak ordaindu ahal izango dira Visa eta Mastercard txartelen eta NFC teknologia duten gailu mugikorren bidez.

Zerbitzuaren hobekuntza hori Europar Batasuneko Next Generation funtsek finantzatu dute, 250.000 euroko zuzkidurarekin, eta Kutxabankek ere parte hartu du. Horrela, Tuvisak aurrera egiten jarraitzen du garraio publikoaren sektorearen eraldaketa digitalarekin duen konpromisoan.