Datozen asteetan uzta lanak hasiko direnez, Ekonomia Garapenaren eta Jasangarritasunaren Sailak zereal soroetan mirotzaren jarraipena egiteko eta haren kontserbaziorako urteko programa jarri du abian.Horregatik, espezie horren garapena bermatzeko, nekazariei esan zaie, soroetan mirotz habiak aurkituz gero, horren berri eman dezatela 689 23 12 11 telefonoaren bidez.

Espezie horien jarraipena egiteko Natura Ondarearen Zerbitzuak ezarritako programaren bidez, habiak hauteman eta haien jarraipena egiten da, batez ere Arabako lautada, mendi eta haranetako zereal eremuetan. 

Habia bat aurkitu ondoren, Natura Ondarearen Zerbitzuak lurzatiaren titularrari jakinaraziko dio habia dagoela, eta eskatuko dio laguntzeko eta, beharrezkoa bada, hesia jartzeko, edo, bestela, segatu gabeko azalera bat errespetatzeko, txitak hegan egiteko adinera iritsi arte, baina egokiena izango da uzta atzeratzea lurzati osoan. 

Kanpaina amaitutakoan, foru erakundeak ebaluazio bat egingo du eta konpentsazio ekonomiko bat ezarriko du lankidetza horrengatik edo lortu gabeko irabazi horrengatik. Hautemandako habia bakoitzeko 50 euro ordainduko ditu, eta uzta atzeratzeagatik gehienez 300 euro ordainduko ditu.

Espezie honek lurrean egiten ditu habiak, eta urteko errunaldiak eta kumeak arriskuan egoten dira, bat egiten dutelako zerealaren bilketa mekanizatuarekin. Horregatik, Saray Zárate foru diputatuak azaldu duenez, "nekazariek zeregin oso garrantzitsua dute kontserbazioan". Segatzean habiak aurkituz gero –ez dira manipulatu behar txitak edo arrautzak–, azalera nahikoa zabala utzi behar da segatu gabe, eta aurkitutakoaren berri eman behar da.

Ekonomiaren Garapenaren eta Jasangarritasunaren Sailak eskerrak eman nahi dizkie nekazariei gero eta laguntza handiagoa emateagatik espezie onuragarri horien kontserbazioan. Iaz mirotz urdinaren 28 habia eta mirotz zuriaren beste 6 hauteman ziren eta haien jarraipena egin zen, eta mirotz urdinaren 48 txita eta zuriaren beste 13 babestu eta salbatu ahal izan ziren.

Hontzaren lanari eta Natural England GKE ingelesarekiko lankidetzari esker, GPS igorleak dituzten hamar eta hamabost ale artean markatuko dira aurten, eta horrek balioko du espezieen, egiten duen espazioaren erabileraren eta jasaten dituzten mehatxu nagusien ezagutza hobetzeko. Kanpaina hori Gasteizko Udalarekin ere koordinatzen ari da, oso inplikatuta baitago espezie horien babesean.