Gasteizko Udalak Europako funtsetatik 41,7 milioi euro mobilizatzea lortu du 20 bat plan eta programen bidez, hau da, batez beste 163 euro biztanleko, Maider Etxebarria alkateak ostegun honetan jakinarazi duenez.
Bere hitzetan, "oso positiboa" izan da gai horrekin lotuta Gasteizko Udalak egindako kudeaketa. Aldeko ebazpenak "bata bestearen atzetik iristen" joan direla eta, horiei esker, Arabako hiriburuak hiri proiektu garrantzitsuak gauzatu eta "herritarren eskaerei erantzun" ahal izango diela nabarmendu du alkateak.
Europar finantzaketa era askotako ekintzak biltzen dituzten 20 bat plan eta programaren bidez lortu da. Etxebarriak azaldu duenez, horiek guztiek "aukera emango digute jauzi kualitatiboa emateko trantsizio energetikoari, espazio publikoa irizpide jasangarriekin berritzeko lanari, mugikortasunari, digitalizazioari, birgaitzeari eta merkataritzari babesa emateari dagokienez, beste hainbat inbertsio lerrorekin batera".
Jarduera horietako batzuk dira, besteak beste, Erdi Aroko hirigunearen birnaturalizazioa, Maturana Berastegi jauregiaren erreforma, TAOren hedapena, Amvisaren digitalizazioa eta Zaramagako Biziberritze Plana.
Ildo horretan, eta Zaramagako Biziberritze Planaren inguruan, alkateak iragarri du "Zaramagaren unea" iritsi dela. Laster, plan zehatza aurkeztuko da auzoko espazio publikoan egingo diren berrikuntzekin. Horietako batzuk izango dira ekipamendu sozial berriak sortzeko eta hobetzeko obrak eta eraikinen birgaitze energetikoa egitea.
Aurreikuspenen arabera, uda ondoren hasiko dituzte lanak auzoko 185 etxebizitzatan (planari atxikitako 358 etxebizitzetatik erdian baino gehiagotan). "Zaharberritu ondoren, etxebizitza horiek erosoagoak, irisgarriagoak eta jasangarriagoak izango dira", ziurtatu du.
Azkenik, Europako funtsak lortzeak dakarren "arrakasta komuna" nabarmendu nahi izan du Gasteizko alkateak. Bere hitzetan, lorpen hori "udalbatza honen borondate politikoaren eta erronka hori onartu duten udal taldeen arteko koordinazio ahaleginaren ondorioa da".
