Gasteizko Udalak, Kirol Zerbitzuaren bitartez, 3.096 plaza eskainiko ditu guztira irailean Gizarte Etxeetan eta udaleko kirol-instalazioetan egingo diren kirol-ikastaroetarako. Jarduerak irailaren 2an hasiko dira eta 6 eta 99 urte bitarteko pertsonei zuzenduta daude.
Ana López de Uralde Kirol zinegotziak jardueren balioa nabarmendu du: “Ikastaroak 2023ko udako kirol-eskaintzaren baitan sartzen dira. Uztaila eta iraila bitartean egiten dira eta kirola egitea gustuko duten pertsonei udan zehar jarduera fisikoa egiten jarraitzeko aukera eskaintzen diete”. Gainera, Udalak antolatutako kirol-jarduerekin lehen harremana izateko ere balio dezakete, eta erabiltzaileek 2023-2024 kanpainan errepikatu egin dezakete”
Irailerako eskaintzak hainbat jarduera ditu, besteak beste, udako padela, mantentze-gimnasia edo G.A.P. (Gluteoak-abdominala-hankak), tai-chi, yoga, egungo erritmoen musika-jarduera, baldintza fisikoa, G-Pump, luzaketak, muskuluen tonifikazioa, frontenisa, uretako zirkuituak, aquagym, aquaerobika, mantentze-igeriketa eta estilo-igeriketa.
Interesdunek aurrez aurre eman dezakete izena Gizarte Etxeetan, kiroldegietan, Mendizorrotzako kirol-esparruan, Gamarrako parkean eta Herritarren Arretarako Bulegoetan. Telefono bidezko izen-emateak 010 zenbakian edo 945 16 11 00 telefono-zenbakian egin daitezke.
Kirol-jardueretarako izen ematearekin ez dago instalazioetarako sarbiderik. Gamarrara sartzeko, abonurik ez duten pertsonek udako abonua edo eguneko sarrera erosi beharko dute. Mendizorrotzaren kasuan, abonurik ez duten pertsonek aldi baterako pasea edo eguneko sarrera erosi beharko dute.
Gainera, frontenis, padel, tenis edo hondartzako boleibol modalitateetan, ikastaro bat egin daiteke gehienez ere udan. Padelerako, teniserako eta mahaiko teniserako, erabiltzaileek beraien pala edo erraketa eraman beharko dute. Estiloen igeriketa ikastaroan izena ematen duten pertsonek hiru estilotan 25 metro jarraian igeri egiten jakin beharko dute.
