Garbiketa-zerbitzuak kaleko baliabideen kopurua murriztuko du gaur

Udaleko garbiketa-zerbitzuak kaleko baliabideen kopurua murriztuko du gaur, tenperatura altuengatiko alerta laranja dela eta. Gasteizen 40 gradura heldu liteke tenperatura gaur, Euskalmetek iragarri duen bezala.

"Tenperatura altuekin aire zabalean egiten diren lanetan jarduteko protokoloa betez (langileekin adostutako protokoloa da, eta bat dator Eusko Jaurlaritzako Osasun Sailaren 2023rako Beroaren Aurkako Planarekin), jaietan garbiketa-lanetan eta hondakinen bilketan lan egiten duten ia hogei lantalde ez dira kalera irtengo, langileen osasuna babesteko", azaldu dute Gasteizko Udaletik prentsa-ohar baten bitartez.

Hala, eta ildo horretatik jarraituz, zehazki, 13 makina eta erratza eskuz pasatzen duten sei langile dira gaur kalera atera ezingo direnak, egingo duen beroa dela eta.

Horrela, Maider Etxebarria alkatearen taldetik jakinarazi dutenez, lantalde horiek garbiketa-lanak egin beharko lituzkete 14:00etatik 21:00etara, "baina ez dute ordu horietan eman ohi duten zerbitzua eskainiko, ez joan-etorriko paseoan, ez beste eremu batzuetan", azpimarratu dute Gasteizko Udaleko komunikazio sailetik.

"Eragozpen honen aurrean, Udalak egoera ulertzeko eta jai-eremuetan hondakinak pila ez daitezen laguntza eskatu die hiritarrei", ondorioztatu zuten.

Azkenik, nabarmentzekoa da jaietan ohikoagoa dela herritarrek ohi baino zabor gehiago botatzea lurrera. Horregatik, Vitoria-Gasteizko Udalak herritarren laguntza eskatzen du, langileak ezingo baitira kalera atera bero-kolpeak saihesteko.