Jesús Guridi Musika Kontserbatorioko ikasleak izango dira Gasteizko 'Astearte musikalak' kontzertuaren protagonistak

Gasteizko Jesus Guridi Musika Kontserbatorioko ikasleak izango dira aste honetako Astearte Musikalak kontzertuaren protagonistak, eta errepertorio zabala interpretatuko dute, Turina, Goepfart, Khachaturian, Haydn, Ravel, Kuri Aldana, Piazzolla, Rachmaninoff, Curtis, Skriabin, Ries konpositoreen obrez osatua.

Hala, eta ildo horretatik jarraituz, urtero bezala, Vital Fundazioaren Astearte Musikalen martxoko bigarren hitzordua Jesus Guridi Kontserbatorioko ikasleei eskainiko zaie. Kontzertua arratsaldeko 19:30ean hasiko da, Vital Fundazioa Kulturunean (Bakea kalea 5, Dendarabako 1. solairua). Gasteizko Jesus Guridi Musika Kontserbatorio Profesionala musikaren sorkuntzarekin eta hedapenarekin konprometitutako zentroa da, eta ematen duen irakaskuntzan musika sinfoniko, tradizional eta modernoko instrumentuak sartzen dira. Gaur egun 480 ikasle eta 78 irakasle ditu. Haien prestakuntza-filosofiak, tresna nagusiaren banakako lanaz gain, etorkizuneko profesionalek talde-interpretazioko praktika ere garatzea eskatzen du, musikarien prestakuntzarako berebiziko garrantzia baitu, eta, gainera, "motibazio-punturik garrantzitsuena da". "Helburu horri jarraituz, hainbat erakunde eta elkarterekin elkarlanean hedapen-jarduerak garatzen dira kontserbatorioan; besteak beste, musika garaikideko Carmelo Bernaola zikloa, Gure Musikariak kontzertu-zikloa, Jazz Uhinak eta biharko emanaldiaren antolatzailea den Vital Fundazioaren Ganbera Musikaren zikloa", azaldu dute gaur Vital Fundaziotik egindako ekimenaren aurkezpenean.