Bilboko Udalak 2,7 milioi euro emango ditu zailtasunak dituzten hegoaldeko herrialdeen garapena sustatzeko

Bilboko Udalak 2.760.047 euro emango ditu diru laguntzetan aurten, zailtasunak dituzten hegoaldeko herrialdeen garapena sustatzeko, lehentasuna emanez hezkuntzari, genero berdintasunari, emakumeenganako indarkeriaren aurkako borrokari, urari eta saneamenduari.

Bilboko Udalak jakinarazi duenez, garapenerako lankidetzarako 2025eko diru laguntzen deialdiaren behin betiko ebazpena onartu du, herrialde pobretuetan giza garapena eta garapen jasangarri eta ekitatiboa sustatzen duten proiektuak eta hirian bertan gizarte eraldaketarako hezkuntzako programak babesteko.

Bada, 2025ean, 42 erakundek jaso dute laguntza, eta 52 ekimen gauzatuko dituzte Latinoamerikako eta Afrikako herrialdeetan, hala nola Bolivian, El Salvadorren, Guatemalan, Rwandan, Senegalen eta Chaden, tokian tokiko erakunderekin lankidetzan.

Bilboko Udalaren Garapenerako Lankidetzarako IV. Gida Planean (2022-2030) adierazten denez, diru laguntzen deialdiak dira udal garapenerako lankidetza politika gauzatzeko tresna nagusia. Diru laguntza horiekin finantzatzen dira hegoaldeko herrialdeetako nazioarteko lankidetza proiektuak eta gizartea eraldatzeko sentsibilizazio eta hezkuntza ekintzak.

Deialdien oinarriek puntuazio sistema bat dute, Bilboko Udalari aukera ematen diona aurkeztutako proiektuen kalitatea ziurtatzeko eta hurrengo urteko aurrekontu memorietan lehentasunezkotzat jotako herrialde eta sektoreetan kontzentratzeko.

Aurtengo deialdian, Bilboko Udalaren garapenerako laguntzen %90 lehenetsitako herrialdeetan pilatu da, eta %80 lehentasun sektorialetan, batik bat genero berdintasun, ur eta saneamendu eta hezkuntzan.