Bilboko Portuak sareko zerbitzu berria abiatu du trenen plangintza eta trazabilitea egiteko

Bilboko Portuko Agintaritzak ePortua Train zerbitzu berria jarri du martxan e-puertobilbao plataforman portuko tren garraioa sustatzeko, lehiakortasuna hobetzeko eta kate logistikoa deskarbonizatzen laguntzeko. Bilboko Portuan trenean jarduten duten eragileei zuzenduta dago, eta trafiko arduradunaren, tren enpresen eta itsas terminalen arteko kudeaketa eta komunikazioa hobetzea ahalbidetuko du.

Bilboko Portuko Agintaritzatik jakinarazi dutenez, zerbitzu berriari esker, operadoreek eskura izango dituzte asteko eta eguneko planifikazioa eta trenak portuan dituen une garrantzitsuen trazabilitatea denbora errealean.

Hain zuzen, trena portuko sailkatze geltokira iristen denetik terminalean kargatzeko edo deskargatzeko eskuragarri jartzen den arteko urrats guztiak ezagutuko dituzte, bai eta, alderantziz, terminalak jakinarazten duenetik trena amaitu dela eta sailkatze geltokian kokatzen den arte ere.

Hala, Bilboko Portuko trenbide zerbitzua "gardena" izango da parte hartzen duten eragileentzat, eta trazabilitate osoa izango da, terminalek beren kudeaketa optimizatzea eta portuko zerbitzuen eraginkortasuna hobetzen jarraitzea ahalbidetuz. Informazio guztia etengabe eguneratuko dute eta, beraz, momentuan bertan jakingo dute ere ezustekoren bat dagoen.

ZERBITZUA

Bilboko Portuko Agintaritzak Sibport enpresaren bidez kudeatzen ditu portuko eremuko trafikoa eta maniobrak, urteko 365 egunetan eta eguneko 24 orduetan zerbitzu neutroa, unibertsala eta lehiakorra emateko. Gaur egun, sei itsas terminalek dihardute trenean, eta ontzi mota dibertsifikatuta dago, edukiontzia, ohikoa, ontziratu gabeko produktu likidoa eta ontziratu gabeko produktu solidoa erabiltzen baitira.

Iaz 4.017 trenek zirkulatu zuten guztira, astean 82 batez beste, eta trenbidez garraiatutako edukiontzien kuota %27koa izan zen. Horri esker, Bilbok lider izaten jarraitzen du portuko sistemaren erabilera kuotan beste urtebetez.