Donostiako Udalak etxeko animaliak arduraz edukitzea sustatzeko kanpaina abiatu du

Donostiako Udalak 'Guau! Zure lagunik onenarekin hiriaz gozatu' kanpaina jarri du martxan, herritarren elkarbizitza hobetzeko eta etxeko animaliak modu arduratsuan edukitzearen inguruan kontzientziatzeko.

Aniztasun, Inklusio eta Ingurumen Zinegotzigoak bultzatutako ekimenaren helburua maskoten jabeen artean ohitura zibikoak sustatzea da, hiria garbi mantentzeko eta herritar guztien ongizatea bermatzeko, sustatzaileek aurkezpenean azaldu dutenez.

Agerraldian zehaztu dutenez, Donostian 17.800 txakur baino gehiago daude erroldatuta, eta horietatik 500dik gora "potentzialki arriskutsu" gisa katalogatuta daude. Horrela, hamar biztanle bakoitzeko txakur bat dago hirian, eta egoera horrek "herritarren kontzientziazioa indartzera eta maskotekin bizitzeko oinarrizko arauak betetzen jarraitzera" behartu du Donostiako Udala.

Bada, kanpainaren baitan informazio ekintzak egingo dira larunbatean eta igandean, maiatzaren 24ean eta 25ean, Kontxako, Ondarretako eta Zurriolako hondartzetan, baita haien inguruetan ere.

Kanpainaren logotipoa duten txano eta orgatxoekin identifikatutako sei pertsonako talde batek txakur gorotzak biltzeko poltsak banatuko ditu doan, 09:00etatik 13:00etara. Horrela, txakurren jabeei beren eginbeharrak betetzeko tresnak eman nahi zaizkie, bai eta kakak ez jasotzeko "edozein aitzakia" kendu ere.

Gainera, hiriko hainbat gunetan kartelak eta material hezitzailea jarriko dituzte eta maskotan arduraz edukitzeari buruzko informazio dosierrak banatuko dira, mezua ahalik eta jende gehienari zabaltzeko.