Bi gizon atxilotu dituzte eta emakume bat ikertzen ari dira Bilbon titulaziorik gabe tratamendu estetikoak egiteagatik

Ertzaintzak 19 eta 37 urteko bi gizonezko atxilotu ditu eta 49 urteko emakume bat ikertzenb ari da osasun publikoaren aurkako delitu bat eta intrusismo profesionala leporatuta, dagokion titulaziorik izan gabe eta kolegiatu gabe Bilbon tratamendu estetikoak egiteagatik eta homologatu gabeko sendagaiak erabiltzeagatik.

Eusko Jaurlaritzako Segurtasun Sailak jakinarazi duenez, Ertzaintzak polizia dispositibo bat ezarri zuen Bizkaiko Medikuen Elkargoaren salaketaren bidez jakin ondoren ustezko bi doktorek tratamendu estetikoak egin behar zituztela Bilboko Alde Zaharreko kontsulta batean.

Ustezko bi medikuek 'errusiar ezpainak' izeneko teknikan espezialistak zirela jakinarazten zuten sare sozialetan, zegokion titulaziorik izan gabe eta kolegiatuta egon gabe.

Ertzaintzako patruilak kontsultara joan ziren ikuskapena egitera, eta egiaztatu zuten lokalaren arduraduna eta 19 eta 37 urteko bi gizon zeudela bertan, tratamendu estetiko batzuk egiteko prest.

Agenteek egiaztagiri profesionalak eskatu zizkieten, eta ez zituztela egiaztatu zuten. Gainera, geletan hainbat botika aurkitu zituzten emateko prestatuta, nahiz eta zegozkien osasun kontrolik ez izan.

Ebidentzia horien aurrean, agenteek bi gizonak atxilotu zituzten osasun publikoaren aurkako delitu bat eta intrusismo profesionala leporatuta. Kontsultaren arduraduna den 49 urteko emakumea ikertzen ari dira delitu berberengatik. Polizia eginbideak amaitutakoan, atxilotuak agintari judizialaren eskuetan jarriko dituzte datozen orduetan.