Eusko Jaurlaritzako gobernu kontseiluak Euskadin lantokiak dituzten enpresa eta pertsona autonomoei zuzendutako diru laguntzen deialdi berria onartu du, bizitza pertsonala, familiarra eta lana bateragarri egitearen arloko diagnostikoak eta ekintza planak egiteko, eta 420.000 euro banatuko ditu.
Ongizate, Gazteria eta Erronka Demografikoaren Sailaren 2025-2028 aldirako Diru Laguntzen Plan Estrategikoaren barruan sartzen da deialdia, eta 210.000 euro banatuko ditu aurten eta 210.000 euro 2026an.
Laguntzak edozein tamainatako erakunde pribatuei zuzenduta daude, baldin eta aholkularitza zerbitzu espezializatuak kontratatu behar badituzte beren diagnostikoa eta kontziliazio plana garatzeko.
Izapideak erabat telematikoak izango dira, indarrean dagoen araudiak ezartzen duen bezala. Eskabideak Eusko Jaurlaritzaren egoitza elektronikoaren bidez aurkeztu beharko dira, eta bertan egongo dira eskuragarri behar diren inprimakiak eta dokumentazio teknikoa.
GASTEIZKO UDALA
Bestalde, Gasteizko Udalak diru laguntzak banatu ditu hirian hamar energia komunitate berri eratzeko eta kudeatzeko kostu osoaren %70 eta %80 artean finantzatuz. Aurkeztutako proiektuek jasotako finantzazio horrekin, eta balorazio teknikoa gainditu ondoren, autokontsumo kolektiboko erregimeneko energia komunitateak sortzea eta kudeatzea bultzatu du.
Gasteizko Udalaren arabera, diru laguntza hauetarako bideratutako 600.000 euroak iazko ekitaldiari dagozkio, gobernu taldeak eta EH Bilduk 2024ko aurrekontuetan lortutako akordioaren ondorioz. Proiektu berri bakoitza abiatzeko laguntza ekonomikoa 75.000 eurokoa izan da gehienez.
