Artium Museoak Juncal Ballestin nazioarteko ikerketa bekarako proposamenak aurkezteko epea ireki du

Gasteizko Artium Euskal Herriko Arte Garaikidearen Museoak 2026ko Juncal Ballestin nazioarteko ikerketa bekarako deialdia egin du, arte feministaren historiografiari eta museoko bildumarekin zerikusia duten emakumezko artistei buruzko ikerketa proiektuei laguntzeko, eta proposamenak aurkezteko epea otsailaren 16ra arte dago zabalik.

Museoko iturriek jakinarazi dutenez, deialdiaren helburua ikerketa proiektu bat aukeratzea da, Euskal Herriko eta nazioarteko arte feministaren historiografiari ekarpen esanguratsua egingo diona edota museoaren eta bere bildumaren programazioarekin zerikusia duten emakume artista eta pentsalarien ekoizpena aztertuko duena.

Deialdira edozein nazionalitateko ikertzaileak aurkez daitezke, adin mugarik gabe, hala banaka nola hautagaitza bateratua aurkezten duen kolektibo bateko kide gisa. Eskatzaileek bekaren iraunaldian garatu beharko ikerketa proiektu argitaragabe bat aurkeztu beharko dute. Iraunaldia bederatzi hilabetekoa izango da, onartzen den egunetik zenbatzen hasita.

Ikerketa garatzeko bideratutako gehieneko zenbatekoa 7.000 euro izango da, eta ikertzailearen edo ikertzaileek ordainsariak eta ikerketaren garapenak eragindako gastuak barne hartuko ditu. Eskabideak aurkezteko azken eguna otsailaren 16a da, eta hautapen batzordeak kontuan hartuko ditu proiektuaren interesa, eskatzailearen profil profesionala eta ikerketa proposamenaren egokitasuna Artium Museoaren helburuen artean.

Artium Museoak antolatzen duen nazioarteko ikerketa bekak Juncal Ballestin (Gasteiz, 1953-2015) artistaren izena darama. Bere bizi ibilbidea konpromiso feministak markatu zuen, eta, obrari dagokionez, askotariko materialak, bitartekoak eta teknikak erabiltzeagatik bereizi zen, hala nola pintura, marrazkia, instalazioa, bideoa edo lan grafikoa.

Iazko edizioan, beka Julia Martos Ramirez artista, programatzaile eta ikertzaile andaluziarrari eman zitzaion, Euskal Herrian artxiboko materialekin lan egiten duten artista eta zinemagileek garatutako berridazketa zinematografikoko prozesuen azterketan oinarritutako proiektu bati esker.